Read Mongondow MAZMUR 30 Bible Online

MAZMUR 30 - Mongondow bible

MAZMUR 30

¹Mazmur i Daud. Dondong pongimpaḷutan kon baḷoi i Allah.

²Akuoi in modayow kon ini-Mu, o TUHAN, sin Iko in noposaḷamatdon kon inakó bo diá nopomayá mako kon musungku nonggoḷokap kon inakó.

³TUHAN Allahku, akuoi in mokuani kon ini-Mu mokituḷung, bo Iko in nongundam kon inakó.

⁴Iko in nopomiḷagui kon inakó nongkon dunia in intau minatoi, bo nomiag bui kon inakó nongkon sigad in intau mita minatoi.

⁵Podondongdon in dondong dodayow kon i TUHAN, ei umat inta motoindudui, bo posukurdon kon i Inta Totok in motusi.

⁶Sin tongábí motoyong in ki TUHAN in tumorú, kopopia-Nea in umuranbí oyúon modapot in kinoouput in kobiagan. Kon tungkuḷ in doḷom mongombaḷ in akuoi, táe modiug mobayag kodongogandon in ḷunganga in gina.

⁷Kon tungkuḷ in noaman, akuoi in noguman, “Akuoi in diábí taḷowon!”

⁸Sin Iko in mopia kon inakó, o TUHAN, Binaḻí-Mu in akuoi naonda bo buḷud inta moroton. Táe onda intua nogadop in Iko kon inakó, bo inangoiandon in ondok in akuoi.

⁹Kon ini-Mu, o TUHAN, pokuanianku, kon i TUHAN in poigumanku,

¹⁰“Onu in mangaḻenea kon ini-Mu aka akuoi matoi bo moponag kon bubú inta poḷobongan? Yo degá intau matoi modayow kon ini-Mu bo mopotaau in kososatia-Mu?

¹¹Indongogaipa, o TUHAN, bo kotabipa in akuoi. TUHAN tuḷungaipa kaasí in akuoi!”

¹²Amuiku ain binaḷuian-Mu nobaḻí tayok pia in gina, Ginamá-Mu in robonoḷ in ginaku bo inogoian-Mu in akuoi in ḷunganga in gina.

¹³Dá akuoi in doíbí tongá kibio-biómai; podondongku in dodayow kon ini-Mu, o TUHAN Allahku, bo mopoyaput in sukur kon ini-Mu modapot in mononoi!