Read Mongondow MAZMUR 31 Bible Online

MAZMUR 31 - Mongondow bible

MAZMUR 31

¹Kon i itoi in mododondong. Mazmur i Daud.

²Akuoi in mokioḻingoi kon ini-Mu o TUHAN, dika pomayá mako in akuoi pokudaion. Posaḷamatdon in akuoi podoyon kon kooadil-Mu

³indongogaipa kaasí in akuoi bo ḷagidon poḷuat in akuoi. Ikodon in mobaḻí buḷud batuku tampat pogadopanku, naonda bo benteng inta moropot, inta mokosaḷamat kon inakó.

⁴Oo, Iko in naonda bo buḷud batu bo benteng inta moropot kon inakó! Kapitdon in akuoi podudui in dandi-Mu.

⁵Poḷuatdon in akuoi nongkon potait inta sinaan kon inakó, sin Ikobí in pogogadopanku.

⁶Kon bonu in kawasa-Mu posarakanku in awakku; Iko in mopoḷuat kon inakó, o TUHAN, Allah inta mosatia.

⁷Intau inta mosumba kon berhala kinodoí-Mu; táe akuoi in mopirisaya kon i TUHAN.

⁸Mopiabí in ginaku bo moḷunganga sin Iko in umuran motabi kon inakó. Iko in noindoi kon rorigaku bo nonondudutmai kon susahku.

⁹Diábí pinomayá-Mu mako akuoi in dakopon in musung, táe inogoi-Mubí in akuoi maya-mayá mako takin diá in ḷabot.

¹⁰Kotabipa kaasí in akuoi, o TUHAN, sin akuoi in kinoantugan in susa; mopomporí in mataku sin mongombaḷ, dimukud bo awakku in mororigadon totok.

¹¹Kobiaganku modait kon bonu in roriga, taongku mita moitaḻib kon bonu in amui mita. Ropotku in mogaat popisí in aidku moraat, nodapot in tuḷanku mita moripú.

¹²Akuoi in tososingkuḻe in bayongan in musungku, nodapot in kon topodiugkumai. Bayongan in intau inta nogogintaauanku moitaḻikokog aka mokoontong kon inakó, moḷagui in mosia aka moyodungkuḷku kon daḷan.

¹³Akuoi in iḻiongdon naonda bo intau minatoi, bo nádon onda bo pakakat inta iḷumbú.

¹⁴Kon ondaka umuranbí oyúon in mokokoningkim; dongogonku in yogombong mita in musungku. Mosia in moyopakat moḷawang kon inakó, bo momia kon tomayá sin moḻimod kon inakó.

¹⁵Táe akuoi in mongamang mako kon ini-Mu, o TUHAN, sin Ikobí in ki Allahku.

¹⁶Iko in umuranbí moḷukad kon inakó; posaḷamatdon in akuoi nongkon musungku mita, bo nongkon intau mita inta mogaḷow kon inakó.

¹⁷Igumon mako Iko in moibogpa kon mogogundoi-Mu; posaḷamatpa kaasí in akuoi popisí in tabi-Mu.

¹⁸Dikabí pomayá mako in akuoi pokopooyáanmai, o TUHAN, sin akuoi in nokuani kon ini-Mu. Biódon mako intau moraat pokopooyáanmai, bo kibio-biómai moponag kon dunia in intau minatoi.

¹⁹Tukumaidon in bibig intau mouboḷ inta takin ḷoḷatú mongempeng kon intau motuḻid in gina.

²⁰Totuu mobayong in tabi-Mu inta sinadia-Mu kon intau inta mopirisaya! Pomuḷoi in intau mokoontong kon kopopia inta pinomia-Mu, kon i monia inta nokioḻingoi kon ini-Mu.

²¹Iko in nobuni kon i monia kon siungon-Mu nongkon toḻimpaan in intau moraat; Iḷukadan-Mu in mosia kon bonu in kawasa-Mu nongkon inta pinonapud in ḷawang.

²²Dinayo-dayowdon in ki TUHAN! Totuu mokoherang in tabi-Nea kon inakó, kon tungkuḷ in akuoi kinopung bo sinubu.

²³Kon dodai in notoboḻingo kon inakó kamai yo akuoi in iḷumbú bidon i TUHAN kon tayowon-Nea. Táe noniatadon kon ki TUHAN in nokidongogdon kon oigumku kon tungkuḷ in akuoi nokuani kon i-Nia.

²⁴Kotabibí in ki TUHAN, ei bayongan in umat-Nea, Ki TUHAN in moḷukadbí kon intau inta mosatia. Táe intau moḷoḷatú in hukumon-Nea takin diá in ukuran.

²⁵Iropotai bo irigonai in ginamu, moiko komintan inta nongamang kon i TUHAN!