Read Mongondow MAZMUR 32 Bible Online

MAZMUR 32 - Mongondow bible

MAZMUR 32

¹Mazmur i Daud. Dondong totundú. Pia in kamang in intau inta dosanea in pinopatan, bo taḷánea in inampungan.

²Pia in kamang in intau inta aidnea moraat diádon irekengmai i TUHAN, bo inta doí mongakaḷ.

³Kon dodai in akuoi diá mongaku kon dosaku, moḷungkoyódon in akuoi popisí in mogamui kinoouput in singgai.

⁴Singgai doḷom Iko in mondorot kon inakó, TUHAN, ropotku in nodait naonda bo sinotop in patú in singgai.

⁵Bo akuoi in nongakudon kon dosaku kon ini-Mu, taḷáku diá in binuniku. Sinantúkudon kon akuonku kon ini-Mu, bo inampungan-Mu in bayongan in dosaku.

⁶Tuamai in pomuḷoi in intau inta motoḷutui musti mosambayang kon tungkuḷ in koumaan in roriga, dá aka ḷunud in susa moiangoi, sia in diábí kodangatannea.

⁷Ikobí in pogogadopanku, Pinoḷuat-Mu in akuoi nongkon roriga. Dá akuoi in nonggoḷokap pia in gina, sin Iko in noposaḷamatdon kon inakó.

⁸Guman i TUHAN, “Akuoi in motundúbí kon daḷan inta musti bayáanmu, iko in kapiton-Kubí bo tongginaan-Ku.

⁹Dika naonda bo kabaḷo inta diá in raian, inta musti diaan in sabarak bo tontogot sinbá dumudui.”

¹⁰Intau binaradosa kinoantugan in roriga mobayong; táe intau inta nongamang kon i TUHAN umuranbí iḷukadan in tabi-Nea.

¹¹Ei intau mita motoḷutui, pokosanangdon bo pokoḷungangadon sin onu inta ain pinomia i TUHAN Porogiowdon takin pia in gina, ei bayongan in intau inta motuḻid in gina!