Read Mongondow MAZMUR 33 Bible Online

MAZMUR 33 - Mongondow bible

MAZMUR 33

¹Ei intau mita motoḷutui, porogiowdon takin pia in gina sin onu inta ain inaidan i TUHAN; patusbí in intau motuḻid in gina umuran modayow.

²Posukurdon kon i TUHAN takin kecapi, modondong kon i-Nia takinan in musik.

³Podondongdon in dondong mobagu kon i TUHAN, kutidon kopia in kecapi bo porogiowdon takin sanang!

⁴Bayongan in tosingogon i TUHAN in totuubí; Sia in mosatiabí kon bayongan in oaidan-Nea.

⁵Sia in motabi totok kon kojojujur bo kooadil; sinangkub in butá nopuḻingbí in tabi-Nea.

⁶Ki TUHAN in nomarenta, dá nobaḻí in ḷangit; mata in singgai, buḷan bo tundi pinomia-Nea pinongin tosingogon-Nea.

⁷Bayongan in tubig kon dagat sinobatú-Nea kon tampat tobatú, baḷangon sinipun-Nea kon bonu in bandungan.

⁸Biódon mako sinangkub in butá motoguondok kon i TUHAN bo intau mita kon dunia mohoromat kon i-Nia.

⁹Sin Sia in nosingog, bo bayongan yagi-yagi binaḻí; Sia in nomarenta, dá bayongan yagi-yagi nooyúon.

¹⁰Ki TUHAN in nopogogai kon bayongan in tomayá mita in bangusa mita, Sia in nonginggamá kon niat monia.

¹¹Táe tomayá i TUHAN in umuranbí mobaḻí, toimbaḷoi-Nea in moroton kinoouput in kobiagan.

¹²Pia in kamang in bangusa inta nongaku kon ki TUHAN in ki Allahnea, pia in kamang in umat inta piniḻí-Nea nobaḻí kapunyaan-Nea!

¹³Nongkon soroga ki TUHAN in moḷongow monag, bo ontongon-Neabí in bayongan intau.

¹⁴Nongkon pomomarentaan-Nea ki TUHAN in nonaridi kon bayongan inta nogutun kon butá.

¹⁵Siabí inta nomia kon gina monia, bo nonotaau kon bayongan in oaid monia.

¹⁶Datu in diábí nountung popisí in nobarong in tontaranea, prajurit in deemanbí nosaḷamat popisí in ropotnea.

¹⁷Kabaḷo in diábí motaau pongata kon mokountung, ropotnea inta moḷoben in diábí mokosaḷamat.

¹⁸Ki TUHAN in moḷukad kon intau mita inta mopirisaya inta mongamang mako kon tabi-Nea.

¹⁹Sia in noposaḷamat kon i monia nongkon popatoi, bo nomiag kon i monia kon tungkuḷ in ginogoi.

²⁰Dá kita in moharap kon i TUHAN, Siabí in mototuḷung bo mododuḷu kon inaton.

²¹Mopia in gina naton popisí in Sia bo mopirisaya kon tangoi-Nea inta motusi.

²²Igumon mako kami umuran kotabi-Mu, o TUHAN, sin kami in mongamang mako kon ini-Mu.