Read Mongondow MAZMUR 34 Bible Online

MAZMUR 34 - Mongondow bible

MAZMUR 34

¹Mazmur i Daud, kon tungkuḷ in sia sinumon intau nobundai kon tayowon i Abimelek, dá inuntun in sia bo minayá.

²Akuoi in moibog mosukur kon i TUHAN pomuḷoi mako, bo diá mogoga-gogai in modayow kon i-Nia.

³Akuoi in moibog yumunggagá sin oaidan i TUHAN; igumon mako kodongogan in intau inta dinorot bo moḷunganga in ginanea.

⁴Poḷantudon in ki TUHAN takinku, igai moyotakin mopomulia kon tangoi-Nea.

⁵Akuoi in nosambayang kon i TUHAN, bo sinubagan-Nea, bo nopoḷuat kon inakó nongkon bayongan inta mokoondok.

⁶Intau dinorot nongamang kon i-Nia bo mopia in gina, diábí in dodoyonan monia kon mooyá.

⁷Intau nororiga in nokuani bo sinubagan i TUHAN, nopoḷuat kon inia nongkon bayongan in roriganea.

⁸Malaekat i TUHAN in moḷukad kon intau inta mopirisaya, bo mopoḷuat kon i monia nongkon anib.

⁹Nanamaidon tontaní naonda in kopopia i TUHAN, pia in kamang in intau inta namangoi kon i-Nia.

¹⁰Horomatdon in ki TUHAN, ei moiko umat-Nea, sin intau inta mopirisaya in diábí kodaitan.

¹¹Umpaka singa mita yo gogoyonbí doman popisí in kodaitan in kaanon; táe intau inta mosumba kon i TUHAN in diábí kodaitan.

¹²Indongogaidon, ei mongoadí mita, tundúonku in moiko mohoromat kon i TUHAN.

¹³Moibog degá in moiko moumur in kobiagan bo motarima kon inta mopia?

¹⁴Dika mosingog kon inta mongoraat, bo dika moibog kon tompobaḻik.

¹⁵Poyayúdon in inta moraat, bo aidaidon in inta mopia, ḷongasidon totok in mobiag mododamean.

¹⁶Ki TUHAN in monaridi mako kon intau inta motoḷutui, Sia in mokidongog aka mosia mokuani mokituḷung.

¹⁷Táe intau inta mogaid kon moraat in doíon-Nea; aka matoi in mosia yo baḷú koḻiongan.

¹⁸Aka intau motoḷutui mokuani, indongogan i TUHAN, bo poḷat moposaḷamat kon i monia nongkon bayongan in roriganea.

¹⁹Ki TUHAN in nodiug kon intau inta kinobuḻian in kamang; bo moposaḷamat kon intau inta noinggamá in ibog.

²⁰Mobayongbí in roriga in intau mopia, táe ki TUHAN in mopoḷuatbí kon inia nongkon bayongan intua.

²¹Awaknea in umuranbí iḷukadan i TUHAN, diábí in tobatúmai in tuḷannea in putoḷon.

²²Inta moraat in matoibí popisí in aidnea moraat, intau inta mondoí kon intau motoḷutui in hukumonbí.

²³Ki TUHAN in moposaḷamatbí kon mogogundoi-Nea mita; inta nosingayow kon i-Nia in diábí hukumon.