Read Mongondow MAZMUR 37 Bible Online

MAZMUR 37 - Mongondow bible

MAZMUR 37

¹Nongkon i Daud. Dika tumorú popisí in intau moraat, dika mointoi kon intau inta nogaid kon noitaḷá.

²Sin mosia in ḷagidon moinggamá naonda bo bonok, bo moḷaḷow naonda bo pinomuḷa noḷunow.

³Popirisayadon kon i TUHAN, bo aidaidon in inta mopia, pogutundon kon butá tatua bo kotoḷutuidon.

⁴Tayakdon in kopiaanmu kon i TUHAN, Pooropon-Neabí in ibog in ginamu.

⁵Poandoḷdon in kobiaganmu kon i TUHAN, pongamangdon kon i-Nia, Sia in motuḷungbí kon inimu.

⁶Poniata-Neabí in kototoinduduimu naonda bo bayag, bo kototuḻid in ginamu naonda bo singgai.

⁷Oḷatdon mako in ki TUHAN takin gina moodom, ḷukadaidon mako pokosabar modapot in Sia mopoaid. Dika tumorú popisí in intau inta nokouḻí kon kobiagannea, andeka inta nonompobaḻik.

⁸Dika tumorú bo monanaḻi in gina, tua in tongábí mokobodito.

⁹Sin intau inta mogaid kon moraat in inggamáanbí, táe inta nongamang mako kon i TUHAN in motarimabí kon butá tatua.

¹⁰Intau moraat in ḷagibí moinggamá, aka tayakon, yo diá bidon in sia.

¹¹Intau inta moompá in dodia in motarimabí kon butá tatua, bo mokouḻíbí kon kobiagan motompia totok.

¹²Intau moraat in monomayábí kon inta moraat kon intau mopia, bo mobobui kon inia takin yaat in gina.

¹³Táe kosinganbí i TUHAN in intau moraat, sin kinotaauan-Neabí in imbuit in kobiagan in intau tatua in nodiugdon.

¹⁴Intau moraat norabut kon kedang bo nopopiot in piotnea sin moḻimod kon intau nobogá bo nororiga, sin momatoi kon intau inta mobiag mopia.

¹⁵Táe intau moraat in kotumbukanbí in kedangnea tontaní, puḷu in piot monia in putoḷonbí.

¹⁶Moyakagkabí in nouḻí in intau mopia tuabí in mopia-pia nongkon kapunyaan mobayong in intau moraat.

¹⁷Sin kawasa in intau moraat in putoḷonbí i TUHAN, táe intau mopia in ḷukadan-Neabí.

¹⁸Ki TUHAN in noḷukad kon kobiagan in intau motoḷutui, kapunyaan budel monia in umuranbí mononoi.

¹⁹Kon tungkuḷ in mororiga, diábí moajar in mosia, kon dodai in malarat in kaanon yo mosia in diábí kodaitan.

²⁰Táe intau moraat in moyopúbí, musung i TUHAN in moinggamábí naonda bo bungang kon rawang, mosia in mobuḻibí kon bonu in poyok.

²¹Intau moraat in moḷuan bo diá mopobui kon onu inta iḷuanannea, táe intau mopia in mobogoibí takin pia in gina.

²²Intau inta binarakatan i TUHAN in motarimabí kon butá tatua, táe intau inta kinutuk-Nea in untunon-Neabí.

²³Ki TUHAN in motundú kon daḷan in intau inta kobobiagnea mokosanang kon i-Nia;

²⁴Aka moḷabú in sia, yo diábí in sia kekeban modaḷom, sin kinadaianbí i TUHAN in sia kon ḻimanea.

²⁵Pinangkoi kon noguodpa in akuoi nodapot in noguyangdon, diábí kon dodai in onda in inontongku intau mopia sinaḷáan i TUHAN, andeka ki adí bo ki ompunea in dongka kino igu-igumnea mako.

²⁶Sia in umuranbí mopoḷuan bo mobogoi, bo ki adínea mita in nobaḻí barakat kon inia.

²⁷Taḷaaidon in inta moraat, aidaidon inta mopia, dá modapotbí in mononoi in buímu mogutun kon butá tatua.

²⁸Sin ki TUHAN in motabibí kon oaid inta mopia bo moadil, intau inta motoindudui kon i-Nia in diábí bio-bióon-Nea mako in moiḷaḻe. Sia in moḷukadbí kon i monia modapot in mononoi, táe buí in intau moraat in yompatonbí.

²⁹Intau motoḷutui in motarimabí kon butá tatua, bo mogutun kon tua modapot in mononoi.

³⁰Intau mopia mosingog takin bijaksana, sia in umuranbí motuḻid kon bonu in singognea.

³¹Hukum i Allahnea in umuran kon bonu in ginanea, sia in diábí iḻimimpat kon tua.

³²Intau mopia tarapon mako in intau moraat inta motayak kon kasampatan moḻimod kon inia.

³³Táe diábí pinomayá mako i TUHAN in sia moḷabú kon bonu in kawasa in musung, andeka hukumon kon dodai in sisigan.

³⁴Pongamangdon kon i TUHAN bo duduiaidon in parenta-Nea, dá duíon-Neabí in iko sin mogabat kon butá tatua; iko in mokoontongbí kon poyopúan in intau moraat.

³⁵Akuoi in nokoontongdon kon intau moraat tobatú inta moambungangaḷ; sia in naonda bo pangkoi in kayu inta mopia bo uakatnea in noikanom noonag.

³⁶Kon tungkuḷ in akuoi [23] moitaḻib, sia in diá bidon onda, sinayakku in sia, táe diá nouḻíku.

³⁷Tondudutka in intau mopia bo motuḻid in gina; intau inta moibog in dodamean mopiabí in kobiagannea moiduduimai.

³⁸Táe intau binaradosa in yopúonbí; buí monia in inggamáanbí.

³⁹Ki TUHAN in moposaḷamatbí in intau motoḷutui, bo moḷukad kon i monia kon tungkuḷ in mororiga.

⁴⁰Sia in notuḷung bo noposaḷamat kon i monia, bo nopoḷagui kon i monia nongkon intau mita moraat, sin mosia in noniung kon i-Nia.