Read Mongondow MAZMUR 38 Bible Online

MAZMUR 38 - Mongondow bible

MAZMUR 38

¹Mazmur i Daud kon tungkuḷ in noposumba in kuruban tompoingat.

²TUHAN, dika mohukum kon inakó kon bonu in torú-Mu, dika moposikisa kon inakó kon bonu in rogi-Mu.

³Piot-Mu in noiḷambai nonongkekeb kon awakku, ḻima-Mu in korasaan mobogat in mondorot kon inakó.

⁴Motakit mobogat in akuoi popisí in torú-Mu; diádon in mosehat in kon awakku popisí in dosaku.

⁵Akuoi in noḷomot kon bonu in taḷáku, mobogatdon totok in korasaanku popisí in dosaku.

⁶Kekebku mita in nonombobogdon bo nobongkogdon, popisí in sinumon bodokdon in akuoi.

⁷Akuoi in noikuyung bo noibungkut, kinoouput in singgai molamurú mako in akuoi bo morobonoḷ in gina.

⁸Patú in rintonow momokak kon awakku, diádon in mosehat kon awakku.

⁹Akuoi in nobutukdon bo kinodaitan in ropot, nogongot in akuoi popisí mokayow in ginaku.

¹⁰TUHAN, kinotaauan-Mu in bayongan in ibogku, amui bo ongotku diá noibuni kon ini-Mu.

¹¹Putúku in modoḷodok, ropotku in nodait, mataku in noyambotdon.

¹²Yobayatku mita yumayú popisí in panyakiku, nodapot in ginaḷum bo utatku yumayú kon inakó.

¹³Intau inta moibog moḻimod kon inakó notaan kon potait kon inakó; inta moibog mopobodito kon inakó nopogogondok moyompat kon inakó.

¹⁴Táe akuoi in nádon onda bo intau bongoḷ inta diá mokodongog, naonda bo intau bobó intau diá mosingog.

¹⁵Totuu, akuoi in naonda bo intau inta diá nokodongog, tuamai in diábí nomayow.

¹⁶Táe akuoi in nongamang mako kon inimu, o TUHAN, bo Iko, TUHAN Allahku, in notubag kon inakó.

¹⁷Dika pomayá mako in musungku ḷumunganga in gina in mokoontong kon kasusahanku, dika pomayá mako in mosia in dumodia in mokoontong kon inakó mourot.

¹⁸Akuoi in gogió bo moumpag, umuranbí mokorasa kon monakit.

¹⁹Inakuku in dosaku mita; moḻia-ḻiaw in ginaku in moraimai kon taḷáku.

²⁰Intau mita inta nosaturu kon inakó in nobayong bo moropot, mosia in doí kon kobobiagku.

²¹Intau inta nopotuḻí in moraat kon inta mopia in mosaturubí kon inakó sin akuoi in nogaid kon inta mopia.

²²O TUHAN, dika taḷaanmai in akuoi, dika yumayú kon inakó, o Allahku.

²³Ḷagidon angoi motuḷung kon inakó, o TUHAN mopoposaḷamatku.