Read Mongondow MAZMUR 39 Bible Online

MAZMUR 39 - Mongondow bible

MAZMUR 39

¹Kon i itoi in mododondong. Mazmur i Daud. Kon i Yedutun.

²Iraiku, “Akuoi in moḷukad kon awak sinbá diá baradosaan in diláku. Akuoi in doíbí mosingog kon dodai in intau moraat nodiugpa.”

³Akuoi in kibio-biómai diábí noposingo-singog, nodapot in nokorugibí tontaní. Bo rorigaku in korasaan naonda bo modugang mobogat;

⁴moḻia-ḻiawdon totok in ginaku. Aka umuran raion, dá modugang mosusa in ginaku; imbuitnea nogumandon in akuoi,

⁵“TUHAN, potaaudon mongo toonu in singgai kopatoianku sinbá kotaauanku kon totuubí mopoḷok in kinobiaganku.”

⁶Totuu mopoḷok in kobiaganku inta sinantú-Mu! Aka kon ini-Mu wakutu kinobiaganku diábí in mangaḻenea. Totuu, intau naa in tongábí naonda bo poginaan,

⁷kobiagannea in moitaḻib naonda bo oḻinow. Bayongan in oaidannea diá in mangaḻenea; sia in momonturung kon kapunyaan, táe diá kotaauan mongo ki ine in mokaan kon tua.

⁸Tanaa onu in oḷatonku mako, o TUHAN? Kon ini-Mubí in pongamanganku.

⁹Poḷuatdon in akuoi nongkon bayongan in dosaku, dika pomayá mako in akuoi tororebeg in intau dondunguḷ.

¹⁰Akuoi in kibio-biómai bo diá mobuká kon bibig, sin Ikobí in nosambok kon inakó.

¹¹Gamádon bui in hukuman-Mu nongkon inakó, sin akuoi in gogiódon matoi in kinotugatan in sambok-Mu.

¹²Intau in popisí in taḷánea; ihukum bo sinambok-Mu naonda bo sisik irimumud-Mu onu inta koboḻi kon inia. Totuu, intau in naonda bo tongá pogirupan in tompot.

¹³Indongogaipa kaasí in sambayangku o TUHAN, taridiaipa in oigumku; dikabí kaasí tongá kibio-biómai aka akuoi mongombaḷ. Naonda bo bayongan in mogoguyangku, tongábí motoyong akuoi in moniung kon ini-Mu.

¹⁴Dika monuyayow kon inakó, sinbá moḻin sanangpa in akuoi, kon tungkuḷ in akuoi diápa mayá bo diádon bui.