Read Mongondow MAZMUR 40 Bible Online

MAZMUR 40 - Mongondow bible

MAZMUR 40

¹Kon i itoi in mododondong. Mazmur i Daud.

²Nosabarbí in akuoi in nogoḷat mako kon totuḷung i TUHAN; bo sinaridian-Nea in akuoi bo nokidongog kon kuaniku.

³Inugut-Nea in akuoi nongkon bubú inta mokoanib, nongkon yoná in dampaḷ. Inukat-Nea in akuoi kon tudu in tombuḷud batu, dá ḷampangku in mopia.

⁴Sinundú-Nea in akuoi nopodondong in dondong mobagu, dondong dodayow kon i Allah naton. Nobayong in intau in nokoontong bo inagían in ondok, bo nopirisaya kon i TUHAN.

⁵Pia in kamang in intau inta mopirisaya kon i TUHAN, inta diá dinumudui nosumba kon dewa mita, andeka nopoigum in totuḷung kon intau mita mongoḷoḷatú.

⁶TUHAN, totuu mobayong in inaidan-Mu kon inami, o TUHAN Allahku, diábí in motaau popotongkaian kon ini-Mu! Nobayongbí in tomayá-Mu inta mokoherang kon inami, diábí kooumanan komintan.

⁷Sosumba bo kuruban oḷudon kinodoí-Mubí, kuruban payongon bo kuruban potobut kon dosa diábí in inigum-Mu. Táe inogoian-Mudon in bongoḷan in akuoi inta pokidongog kon singog-Mu.

⁸Bo akuoi in noguman, “Naadon in akuoi, kon bonu in ḻitodan in buk pinais kon inakó.

⁹Mopia in ginaku in mogaid kon kinoibog-Mu, o Allah, hukum-Mu sinagúku kon bonu in gina.”

¹⁰Kon bonu in poyosipunan in umat-Mu potaauku in habar mokosanang kon Iko in noposaḷamatdon kon inami. Diá mogoga-gogai potaauku intua, kinotaauan-Mubí intua komintan, o TUHAN.

¹¹Habar kasaḷamatan tatua in diábí tongá sinagúku mako kon bonu in gina, totuḷung bo kososatia-Mu umuran potaauku. Kon tayowon in poyosipunan in umat-Mu diábí in akuoi tongá kibio-biómai, táe pinotaaukubí in tabi bo kososatia-Mu.

¹²TUHAN, dikabí mogogai in monotabi kon inakó; umurandon ḷukadai in akuoi in tabi bo kososatia-Mu.

¹³Akuoi in kinopung in bodito inta mobayong, kobayongnea in diádon koiyapan. Akuoi in inaḷo-aḷowan mako in dosaku nodapot in akuoi diádon mokoontong. Kobayongnea in noiḻiu kon kobayong in buok kon uḷuku, nodapot in akuoi kinobuḻian in kamang.

¹⁴O TUHAN, posaḷamatpa kaasí in akuoi, TUHAN ḷagidon tuḷungai in akuoi!

¹⁵Biódon mako in intau inta moibog moḻimod kon inakó taḷowon bo moḷagui motoboḻingo. Biódon mako in intau inta monggiow kon susaku upeton modapot in umundok bo singkuḻeon.

¹⁶Biódon mako in intau inta kinumosing kon inakó moitaḻikokog bo mooyá.

¹⁷Igumon mako in bayongan in intau inta nosumba kon ini-Mu moḷunganga bo mopia in gina, bo bayongan inta motabi kon kasaḷamatan nongkon ini-Mu umuran moguman, “Totuubí moḷantud in ki TUHAN!”

¹⁸Akuoi naa in nobogá bo moyangkó, táe ki TUHAN in nonaridi kon inakó. Ikobí in mototuḷung bo mopoposaḷamatku, dikapa kaasí oḷoian, o Allahku!