Read Mongondow MAZMUR 41 Bible Online

MAZMUR 41 - Mongondow bible

MAZMUR 41

¹Kon i itoi in mododondong. Mazmur i Daud.

²Pia in kamang in intau inta moindoimai kon intau inta moyangkó; ki TUHAN in motuḷungbí kon inia kon dodai in moyoyiga.

³Ki TUHAN in mogoḻiung bo moḷukadbí kon inia, Sia in mobogoibí in kobiagan mopia kon inia kon dunia naa, bo diábí moposarakan kon inia kon kawasa in musungnea.

⁴Ki TUHAN in motuḷungbí kon inia kon dodai in motakit, bo mopoguḻí in ropotnea.

⁵Gumanku, “Akuoi in binaradosadon kon ini-Mu, o TUHAN, kotabipa kaasí in akuoi bo undamaipa in akuoi.”

⁶Musungku in mosingog kon inta moraat soaḷ akuoi, ibogon monia in matoi in akuoi bo koḻiongandon.

⁷Intau mita inta noḷongow kon inakó diábí notuḻid in gina. Mosia in nosipun kon ouman diá mopia soaḷ akuoi, bo mopowaya magí-mako intua.

⁸Bayongan inta doí kon inakó moyogombong; mosia in mongonguman kon inta totok in diá mopia soaḷ akuoi. [24]

⁹Guman monia, “Takitnea in mobogatdon totok, diábí doman inta mobangonpa bui in sia.”

¹⁰Nodapot in yobayat inta totok in pinirisayaku, intau inta nongaan noyotakinku, ain noningkuḻe kon inakó.

¹¹Kotabipa kaasí in akuoi, o TUHAN, undamaipa in akuoi, sinbá akuoi motaau motuḻí kon aid moraat in saturuku mita.

¹²Aka akuoi diá taḷowon in musungku, yo kotaauankudon kon Iko in moibog kon inakó.

¹³Iko in motuḷung kon inakó popisí in ginaku motuḻid, bo binaḻí-Mu in akuoi nobiag moyotakin-Mu modapot in mononoi.

¹⁴Dayowdon in ki TUHAN, Allah in Israel! Dayowdon in Sia tanaa dapot in mononoi! Kobaḻídon in natua. Amin!