Read Mongondow MAZMUR 42 Bible Online

MAZMUR 42 - Mongondow bible

MAZMUR 42

¹Kon i itoi in mododondong. Dondong totundú in inanakan i Korah.

²Naonda bo rusa monanob kon tubig in ongkag, natuata in dimukudku monanob kon ini-Mu, o Allah.

³Akuoi in mokotanob kon i Allah inta nobiag, toonu in motaau in akuoi mayá moibada kon Baḷoi-Nea?

⁴Singgai doḷom mongombaḷ in akuoi, dongkadon ḷuá in mobaḻí kokaanonku. Kinoouput in singgai musungku in moḻibó, “Kon onda in ki Allahmu?”

⁵Moajar in ginaku aka mokotorop kon singgai tungkuḷ intua, kon tungkuḷ in akuoi mayá in Baḷoi TUHAN moyotakin in intau mobayong sin momia kon bobutungan. Akuoi in kon muna in intau mobayong tatua sindaḷan mopodondong in dondong dodayow.

⁶Nongonu sin ginaku in moajarbí bo moḻia-ḻiaw? Akuoi in mongamang mako kon i Allah. Dá akuoi in buibí mopoyaput in sukur kon i-Nia, kon i Allahku bo mopoposaḷamatku.

⁷Kon butá pinoḷumbúan tanaa mororiga totok in ginaku, tuamai in kinotoropanku in ki TUHAN. Dimukudku in dinia in robonoḷ in gina, akuoi in inuntag in ḷunud kotombaukan; naonda bo tubig kon popoḷabúan in Ongkag in Yordan nongkon Buḷud in Hermon bo Buḷud in Mizar.

⁹Igumon mako ki TUHAN mopoontong in tabi-Nea kon tungkuḷ in singgai, sinbá kon tungkuḷ in doḷom mokopodondongdon in akuoi, bo mosambayang kon i Allah pangkoi in kobiaganku.

¹⁰Akuoi in noguman kon i Allah, mododuḷuku, “Nongonu sin kinoḻiongan-Mubí in akuoi? Nongonu sin akuoi in mustibí umuran mobaba kon roriga, popisí in doroton in musungku mita?”

¹¹Morimumudon totok in ginaku popisí in rebeg in musung. Mosia in tantúbí moḻibó, “Kon onda in ki Allahmu?”

¹²Nongonu sin morobonoḷbí bo moḻia-ḻiaw in ginaku? Akuoi in mongamang mako kon i Allah. Dá akuoi in buipabí mopoyaput in sukur kon i-Nia, kon i Allahku bo mopoposaḷamatku.