Read Mongondow MAZMUR 46 Bible Online

MAZMUR 46 - Mongondow bible

MAZMUR 46

¹Mazmur in inanakan i Korah. Kon i itoi in mododondong. Pinongin dondong Alamot.

²Ki Allah in mogogoḻingoi bo pangkoi in ropot naton; Sia in umuranbí taḷaoḷat bo mokotuḷungbí kon bonu in yoyiga.

³Dá diábí moondok in kita, umpakabí modandú in dunia, bo buḷud mita moitaḷom kon apad in dagat;

⁴umpakabí dagat modoḻiok bo mobokoḷ moḷoben, bo tombuḷud mita mourot popisí in kodangatannea.

⁵Oyúon in daḷan tubig inta mokopia kon gina kon kotá i Allah, pogogutunan i Allah Inta Totok in moḷantud.

⁶Ki Allah in nogutun kon tua, dá kotá tatua in diábí moinggamá; Tuḷungan-Neabí kon dodai in modiugdon mobayag.

⁷Ki Allah in nonggotup, dá dunia in norimumudon totok; bangusa mita in modoḻiok, dodatuan mita noobat.

⁸Ki TUHAN Inta Totok in mokawasa moyotakin naton, ki Allah i Yakub noḷukad kon inaton.

⁹Igai, indoiaika mongo onu in pinomia i TUHAN, totuu mokoherang in oaidan-Nea kon dunia!

¹⁰Sia in nopogogai in parang kon sinangkub in dunia, piot bo pandong irimumud-Nea, kaḻeaw noḻimbung in sinubá-Nea.

¹¹Kai-Nia, “Pogogaidon moparang; pokotaaudon, Akuoi naa in Allah, Akuoi in momulia kon sigad in bangusa mita, momulia kon sinangkub in butá.”

¹²Ki TUHAN Inta Totok in mokawasa kotaki-takin naton, ki Allah i Yakub noḷukad kon inaton.