Read Mongondow MAZMUR 48 Bible Online

MAZMUR 48 - Mongondow bible

MAZMUR 48

¹Mazmur in inanakan i Korah.

²Totuubí moḷantud in ki TUHAN bo totok in dinayow kon kotá i Allah naton, kon tombuḷud inta motusi. [27]

³Sion, tombuḷud i Allah nosindog notompia kotá i Datu Moḷantud mokopia kon gina in sinangkub in butá.

⁴Ki Allah in nogutun kon komaḻig-Nea mita, noniata magí Siabí tontaní in moḷoḷukad-Nea.

⁵Indoiaika, datu mita in moyosipun; mosia in mamangoi sin moibog monubu.

⁶Táe mokoontong kon tombuḷud tatua, noitongau in mosia; nodoḻiok in mosia bo noḷagui notoboḻingo.

⁷Kon tua mosia in nourot in ondok bo mogigon kon monakit, naonda bo bobay inta mononggadí,

⁸naonda bo kapaḷ inta norimumud in deḷang.

⁹Ná inta dinongog naton, tanaa in inontongdon naton intua, kon Kotá i TUHAN Inta Totok in mokawasa. Kotá tatua in Kotá i Allah naton, Dinuḷuannea intua nodapot in mononoi.

¹⁰Kon bonu in Baḷoi-Mu kami in monano-nanob kon tabi-Mu, o Allah.

¹¹Tangoi-Mu kinotaauandon totok bo dinayow kon sinangkub in butá, Iko in nomarenta nokopoadil.

¹²Biódon mako rayat in Sion bo Yohuda norogiow pia in gina, sin ihukum-Mu in musung monia.

¹³Ḻibudon in Sion, ḻibudon in sia, bo iyapdon in ḷangkeangnea.

¹⁴Taridiai in dindingnea, pirikisadon in bentengnea, sinbá motaau in moiko mongonguman kon buímu:

¹⁵“Siabí tua in ki Allah, Allah naton modapot in mononoi, Sia in modia kon inaton modapot in mononoi.”