Read Mongondow MAZMUR 49 Bible Online

MAZMUR 49 - Mongondow bible

MAZMUR 49

¹Mazmur in inanakan i Korah. Kon i itoi in mododondong.

²Indongogaidon, ei bayongan in bangusa, taandon mako in bongoḷan, ei intau mita in dunia,

³pinomayá intau biasamai, andeka intau inta sinangoian, pinomayá intau nobogá, andeka intau nooyúon.

⁴Akuoi in mopoyaputbí in tosingogon mita inta mobijaksana, onu in kon raianku naa totuubí modaḷom.

⁵Akuoi in monondudutbí kon pribahasa, bo moginsilang kon mangaḻenea sindaḷan mokuti kon kecapi.

⁶Akuoi in diábí moondok kon tungkuḷ in singgai diá mopia, tungkuḷ in akuoi kinopung in musung inta moraat.

⁷Mosia tua in mopongata in kaoyúonannea, bo mopododia in kapunyaannea.

⁸Totuubí kon diábí in tobatúmai in mokoposaḷamat kon awaknea tontaní, andeka mobogoi in tontobutnea kon i Allah.

⁹Onuka in ogoinea diábí mokotugat; moiḻiu in ḷantud in boḻi in tontobut kon nyawanea,

¹⁰sinbá moisimparut in sia kon popatoi bo mobiag modapot in mononoi.

¹¹Diá, sia in mokoontongbí kon intaukabí inta mobijaksana yo matoibí doman. Intau dondunguḷ bo pompuḷong tumpaḷabí moyopú, bo monaḷámai kon kapunyaannea kon intau ibanea.

¹²Mosia in mogutunbí kon poḷoḷobongan modapot in mononoi; tuabí in pogutunan monia motantú, umpakabí dungkuḷmai mosia mobayong in butá.

¹³Intau in diábí umuran mobiag kon bonu in kaoyúonan; naonda bo mahaḷuk, sia in moyopúbí doman.

¹⁴Natuata in ukur in intau inta mopongata in awaknea, bo singgai moiduduimai in intau inta moorop in tosingogonnea.

¹⁵Naonda bo domba, mosia in sinantúbí kon matoi; popatoi in mobaḻí gombala monia. Doḷo-doḷom mosia sinaḷowdon in intau mojujur; awak monia in ḷagidon mobongkog kon dunia in intau minatoi, noyayú kon pogogutunan inta mopia totok.

¹⁶Táe ki Allah in mopoḷuatbí kon inakó, Sia in mopoḷuatbí kon inakó nongkon kawasa in popatoi.

¹⁷Dika moondok aka intau tobatú bo mobaḻí mooyúon, bo kapunyaannea in modugang mobayong.

¹⁸Sin kon tungkuḷ in matoi sia in diábí mokopodia kon onu bo onu, kapunyaan in diábí moponag kon poḷoḷobongan takinnea.

¹⁹Nodapot in aka intau tobatú nobiag nokouḻí kon kobiagannea, bo dinuí-duí popisí in inta nouḻínea,

²⁰yo sia in moiduduibí doman kon mogoguyangnea mayá in tampat inta mosindip modapot in mononoi.

²¹Intau in diábí umuran mobiag kon bonu in kaoyúonan, naonda bo mahaḷuk, sia in moyopúbí doman.