Read Mongondow MAZMUR 5 Bible Online

MAZMUR 5 - Mongondow bible

MAZMUR 5

¹Kon itoi in mododondong. Takin itog in bansí. Mazmur i Daud.

²O TUHAN, indongogaipa kaasí in tosingogonku mita, taridiaipa in amuiku mita.

³Indoiaipa kaasí in oigumku bo tuḷungaipa in akuoi, o Datuku, o Allahku.

⁴Sin Ikobí in posambayanganku, o TUHAN, indongogaipa kaasí in kuaniku doḷo-doḷom. Doḷo-doḷom diaanku in sosumbaku [4] bo oḷatonku mako in tubag-Mu, o TUHAN.

⁵Iko in Allah inta doí kon inta aid moraat; inta moraat in diábí motaau in mamangoi kon ini-Mu.

⁶Doíbí in Iko in moindoi kon intau inta mokaḷakuang, kinodoí-Mubí in intau inta momia kon inta moraat.

⁷Yopúon-Mu in intau mita inta moibog monguboḷ. Mopopak bo moḷoḻimod mobú in Iko in mokoontong.

⁸Táe popisí in tabi-Mu inta moḷoben, akuoi in motaaubí tumuot kon bonu in Baḷoi-Mu. Dumokó in akuoi tumayow kon Baḷoi-Mu inta motusi, bo sumbáanku in Iko takin ḻimbatú in gina.

⁹O TUHAN, totuubí mobayong in saturuku! Kapitdon in akuoi in mogaid kon onu in kinoibog-Mu, bo poontongdon in daḷan-Mu inta musti bayáanku.

¹⁰Sin tosingogon in musungku in diábí motaau pirisayaanmai; gina monia in nopuḻing in tomayá moraat. Tosingogon monia in mopia mokooangá, táe bonu in dodob monia nopuḻing in moraat.

¹¹Hukumdon in mosia, o Allah, pomayádon mako in mosia mobodito popisí in tomayánea tontaní. Untundon in mosia sin nobayongdon in dosa monia, sin mosia in nomarontakdon kon ini-Mu.

¹²Igumon mako bayongan in intau inta noniung kon ini-Mu mopia in gina bo tantú monggoḷokap. Ḷukadaidon in intau mita inta motabi kon ini-Mu, sinbá moḷunganga in gina monia popisí in Iko.

¹³Sin barakatan-Mu in intau inta motoindudui kon ini-Mu, ḷukadan-Mu in tabi-Mu in mosia.