Read Mongondow MAZMUR 50 Bible Online

MAZMUR 50 - Mongondow bible

MAZMUR 50

¹Mazmur i Asap. TUHAN, Allah Inta Totok in mokawasa, nosingog; Sia in nomaḷú kon sinangkub in butá nongkon pomukaan nodapot kon toyopan.

²Nongkon Sion, kotá inta totok in mogaga, Ki Allah in noitukat takin nonindar.

³Ki Allah naton in namangoi bo tongá kibio-biómai, Sia in inunaan in tuḷú inta modilá, bo iḻibu in deḷang inta motoyang.

⁴Sia in mogoiní kon ḷangit bo butá sin moindoi kon ponisigan-Nea kon umat-Nea.

⁵Guman-Nea, “Sipundon in bayongan in umat-Ku inta ain nomia kon dodandian takin-Ku, bo sinoimpaḷut in kuruban inta iratá.”

⁶Ḷangit in mopotaau kon ki Allah in monisig kon umat-Nea, bo Siabí tontaní in hakimnea.

⁷“Indongogaidon, ei umat-Ku, Akuoi in mosingog, Israel, Akuoi in moibog gumuman kon i monimu; Akuoi naa in ki Allah, Allahmu.

⁸Deemanbí popisí in kurubanmu bo Akuoi in moponapud kon i monimu; kuruban payongonmu tantúbí oyúon in kon tayowon-Ku.

⁹Akuoi in diábí moparaḷu kon sapi nongkon ḷantungmu, andeka bembé nongkon paanan in bobiagonmu;

¹⁰sin bayongan in mahaḷuk kon kayuon Akuoibí in kitogi, bo bobiagon kon bayongan in buḷu-buḷudannea.

¹¹Bayongan in ḷagapan kon buḷud Akuoi doman in kitogi, bo bayongan in mahaḷuk inta nobiag kon rawang kayuon.

¹²Aka gogoyon in Akuoi, diábí bain poguman-Ku kon inimu, sin butá takin tombonunea in Akuoibí in kitogi.

¹³Akuoi in diábí mokaan kon tapú in sapi koḷakian, diábí doman monginum kon dugú in bembé koḷakian.

¹⁴Posumbadon in kuruban sukur kon i Allah, [28] intompodaidon in dandimu kon i Inta Totok in moḷantud.

¹⁵Pokuanidon kon i-Nakó kon dodai in koantugan in bodito, Poḷuaton-Kubí in moiko, bo moiko in modayowbí kon i-Nakó.”

¹⁶Táe ki TUHAN in noguman kon intau moraat, “Diábí in hakmu in monangoi kon hukum-Ku, bo mongonguman soaḷ dodandian-Ku.

¹⁷Sin iko in doí mokidongog kon toboḷow-Ku, bo mondoí kon parenta-Ku mita.

¹⁸Aka ontongon-Mu in mononakow, dumudui in iko kon inia, bo iko in moyobayat in intau mita inta moibog monuaḻing.

¹⁹Iko in umuran mosingog kon inta moraat, bo umuran mako mopobayá in tompobaḻik.

²⁰Iko in umuranbí moponapud in uboḷ kon ginaḷummu, bo moposingo-singogmai kon i utatmu totok.

²¹Tuata in inaidanmu, táe Akuoi in tongábí kibio-biómai, dá iraimumai dá Akuoi in notongkaimubí. Táe tanaa in empengon-Ku in iko, bo tua mita in poniataan-Kubí kon inimu.

²²Tondudutka, moiko inta nokoḻiong kon i Allah; ḷukadai bá diá dapot in yopúon-Ku in moiko, bo diábí in moposaḷamat.

²³Intau inta moposumba in sukur mobaḻí kurubannea, siabí tua inta mohoromat kon i-Nakó; bo kon intau inta nosadia kon daḷan in poontong-Kubí in kasaḷamatan nongkon i-Nakó.”