Read Mongondow MAZMUR 51 Bible Online

MAZMUR 51 - Mongondow bible

MAZMUR 51

¹Kon i itoi in mododondong. Mazmur i Daud

²naonda in sia sinoboḷow i Nabi Natan popisí in nonuaḻing takin i Batsyeba.

³Kotabipa kaasí in akuoi o Allah, sin Iko in umuranbí oyúon in tabi, popataidon in dosaku sin moḷoben in tabi-Mu.

⁴Bataaidon in bayongan in aidku moraat; daritaidon in akuoi nongkon dosaku.

⁵Sin inakukubí in bayongan in taḷáku, dosaku in umurankubí toro-toropon.

⁶Tongábí kon ini-Mu, tongábí kon ini-Mu binaradosa in akuoi, bo pinomiaku in onu inta inanggap-Mu moraat. Dá patusbí hukumon-Mu in akuoi, moadilbí in pononantú-Mu.

⁷Totuubí, akuoi in moraat pinangkoi kon dodaipa in pinononggadí, bo kinotugatandon in dosa pinangkoi kon bobuḷadían.

⁸Iko in monuntut kon kototuḻid in gina; pogonúaidon in ginaku in hikmat-Mu.

⁹Potusidon in akuoi, dá modaritbí in akuoi; bataaidon in akuoi, dá akuoibí in mobudo-budó in kapot.

¹⁰Biódon mako in akuoi mokodongog kon habar mokopia kon gina, sinbá gina inta binutuk-Mu naa in buidon monggiow.

¹¹Dikapa bobuion in dosaku mita, bo popataidon in bayongan in taḷáku.

¹²Baḻídon in ginaku naa modarit, o Allah, toimbagudon in ginaku takin ibog inta moroton.

¹³Dikadon ḷumbúon in akuoi kon tayowon-Mu, bo dika gamáan in roho-Mu inta motusi kon inakó.

¹⁴Poḷungangadon in ginaku bui popisí in kasaḷamatan nongkon ini-Mu, ogoiaidon in gina inta moibog tumoindudui kon ini-Mu.

¹⁵Dá tundúonku in parenta-Mu kon intau baradosa, sinbá mobuidon mangoi in mosia kon ini-Mu.

¹⁶Posimparutdon in akuoi nongkon popatoi, o Allah mopoposaḷamatku, [29] dá takin pia in gina potaauku in kooadil-Mu.

¹⁷O TUHAN, tuḷungaipa in akuoi mosingog, dá akuoi in modayowdon kon ini-Mu.

¹⁸Iko in doíbí kon kuruban ratáan; aka kuma bo akuoi moposumba in kuruban payongon, yo doíbí Iko intua.

¹⁹Kuruban kon i Allah in ginabí inta norimumud, gina inta motoindudui bo notobat diábí inindoí-Mu.

²⁰O Allah, poontongpa in kopopia-Mu kon Sion, posindogdon bui in dinding mita in Yerusalem.

²¹Dá Iko in moibogbí motarima kon kuruban inta patus, kuruban payongon bo kuruban inta noḻimbatú sapi koḷakian in pokurubanbí kon tudu in mezbah-Mu.