Read Mongondow MAZMUR 56 Bible Online

MAZMUR 56 - Mongondow bible

MAZMUR 56

¹Kon i itoi in mododondong. Podudui in dondong: Paḷoma inta kibio-biómai, nongkon butá inta moyayú. Mazmur i Daud kon tungkuḷ intau in Pilistin modomok kon inia kon Gad.

²Kotabipa kaasí in akuoi, o Allah, sin sinubu in akuoi, umuranbí in akuoi doroton in musungku mita.

³Kinoouput in singgai akuoi iyunta-yuntai in saturuku; mobayongbí in mosaturu kon inakó, o Allah Inta Totok in moḷantud.

⁴Kon dodai in noondok in akuoi, akuoi in nongamang kon ini-Mu.

⁵Akuoi in nodayow kon i Allah popisí in onu inta pinodandi-Nea; akuoi in mopirisaya kon i-Nia, dá diá moondok in akuoi, diábí mokopongonu in intau kon inakó.

⁶Kinoouput in singgai musung mopotombauk in pelekaraku, umuranbí in mosia moḷongasi mopobodito kon inakó.

⁷Mosia in moyosipun kon tampat noiadop, motarap mako kon bayongan inta aidanku, bo motayak kon kasampatan moḻimod kon inakó.

⁸Oyúon degá in kasaḷamatan kon aid moraat monia? Yopúdon in mosia kon bonu in torú-Mu, o Allah!

⁹Iko in nogiap kon singgai mita binaya-bayáanku mako, bo nonotaau kon kobayong in ḷuáku; yo degá diá iniap-Mu intua?

¹⁰Kon singgai in akuoi mokuani kon ini-Mu, musung in bongkugonbí modapot in umundok, sin kinotaauanku kon ki Allah in dumotábí kon inakó.

¹¹Akuoi in modayow kon i TUHAN Allah, popisí in onu inta pinodandi-Nea.

¹²Akuoi in mopirisaya kon i-Nia, dá diábí in akuoi moondok, intau in diábí mokopongonu kon inakó.

¹³Akuoi in mogintompodbí kon dandiku kon ini-Mu, o Allah, bo moposumba in kuruban sukur kon ini-Mu.

¹⁴Sin pinosimparut-Mu in akuoi nongkon popatoi, iḷukadan-Mu in akuoi sinbá diá moḷabú. Dá akuoi in motaaubí mobiag kon bonu in oḻiung i Allah, kon bonu in sindar inta monimbayag kon bayongan inta nobiag.