Read Mongondow MAZMUR 57 Bible Online

MAZMUR 57 - Mongondow bible

MAZMUR 57

¹Kon i itoi in mododondong. Podudui in dondong: Dika momutú. Mazmur i Daud, kon dodai in sia noḷagui sinumuot kon bonu in angob sin moḷagui kon i Saul.

²Kotabipa kaasí in akuoi, o Allah, kotabipa in akuoi, sin kon ini-Mu in pogadopanku. Kon bonu in koḻikip-Mu mogadop in akuoi, modapot in mogogai in deḷang inta nondangat.

³Akuoi in nokuani kon i Allah Inta Totok in moḷantud, kon i Allah inta motuḷung kon inakó.

⁴Nongkon soroga Sia in motubag bo moposaḷamat kon inakó; Sia in nonaḷow kon intau mita inta mondorot kon inakó. Poontongbí i Allah kon Sia in mosatia kon inakó, bo umuranbí motabi kon inakó.

⁵Akuoi in kinopung in musung, mosia in naonda bo singa mokokaan kon intau. Ingipon monia naonda bo ginubat bo piot, dilá monia in naonda bo kedang inta moḷanit.

⁶O Allah, poontongdon in koḷoḷantud-Mu kon ḷangit, bo kamuliaan-Mu kon sinangkub in butá.

⁷Musungku in motaan kon potait kon inakó, bo momutoḷ kon ibog in ginaku. Mosia in nongaḻi kon bubú kon daḷanku, táe mosiabí tontaní in noibonu kon tua.

⁸Akuoi in totuubí kon mopirisaya, o Allah, akuoi in totuubí kon mopirisaya, akuoi in moibog mododondong bo modayow kon ini-Mu.

⁹Ei pobangondon, in dimukudku! Ei pobangondon, gambus bo kecapi! Akuoi in moibogbí mopobangon kon mata in singgai.

¹⁰TUHAN, akuoi in moibog mopoyaput in sukur kon ini-Mu kon yua-yuak in bangusa mita. Moibog in akuoi mopodondong in dodayow kon ini-Mu kon yua-yuak in umat intau.

¹¹Sin tabi-Mu in moḷantud modapot in ḷangit, bo kososatia-Mu modapot in goḷom mita.

¹²O Allah, poontongdon in koḷoḷantud-Mu kon ḷangit, bo kamuliaan-Mu kon sinangkub in dunia.