Read Mongondow MAZMUR 58 Bible Online

MAZMUR 58 - Mongondow bible

MAZMUR 58

¹Kon i itoi in mododondong. Podudui in dondong: Dika moyopú. Mazmur i Daud.

²Ei mongongawasa mita, [30] moadil degá pononantúmu? Nojujur degá in moiko kon dodai in nonisig kon intau?

³Diá, moiko in nonomayá kon moraat, bo nopoaid kon inta mobogat kon butá tanaa.

⁴Intau moraat ain noiḷaḻe pinangkoipamai kon bonu in bobuḷadían mosia in nongakaḷdon pinangkoipamai kon pinononggadí.

⁵Mosia in korasum naonda bo uḷag mobisa, bo momompon kon bongoḷannea naonda bo uḷag kobra bongoḷ

⁶inta diá mokodongog kon singog in pawang inta mopandoi, andeka singog in mososingog kon totaau inta motoḻindat.

⁷O Allah, putoḷdon in ingipon mita monia, rabutdon in uwaḷa in singa mita batánea tatua, TUHAN.

⁸Biódon mako in mosia moinggamá naonda bo tubig inta gumabut, naonda bo piot inta ain notutut.

⁹Biódon mako in mosia naonda bo kií inta ḷumoḷayat mobaḻí muntong, naonda bo adí mointok inta minatoi kon tungkuḷ in diápa nokoontong kon nobayag.

¹⁰Kon dodai in diápa kinotaauan, nodaitdon muna in mosia, naonda bo bonok dugi inta noḷunowpa bo diápa noḷantud nodait pinoḷayug in tompot, naonda bo pinomuḷa noingkag.

¹¹Mokoontong kon intau moraat hukumon, mopia in gina in intau motuḻid, bo momatá kon sioḷnea kon bonu in dugú in intau moromú.

¹²Intau in moguman, “Totuu kon intau mopia in motarimabí kon bungai in oaidnea, totuu, oyúonbí in ki Allah inta monisig kon dunia.”