Read Mongondow MAZMUR 59 Bible Online

MAZMUR 59 - Mongondow bible

MAZMUR 59

¹Kon i itoi in mododondong. Podudui in dondong: Dika moyopú. Mazmur i Daud, kon tungkuḷ in ki Saul nopotabá kon intau noḷukad kon baḷoinea sin moḻimod kon inia.

²O Allah, posaḷamatdon in akuoi nongkon musungku mita, oḻingoiaidon in akuoi nongkon intau inta monubu kon inakó.

³Poḷuatdon in akuoi kon intau inta mopoaid in moraat, pomiḷaguidon in akuoi nongkon moḷoḻimod mita.

⁴Indoiai, mosia in noḷabot sin moḻimod kon inakó, intau mita moḻingá noyodugang moḷawang kon inakó; bokaka deemanbí popisí in nogaid kon dosa in akuoi andeka iḻimimpat, o TUHAN.

⁵Deemanbí doman popisí in taḷáku, mosia in iḻimika-ḻikatdon bo mogoḷatdon mako.

⁶Sindogdon, o Allah Inta Totok in moḷantud, tuḷungaipa in akuoi. O Allah in Israel, indoiaidon tontaní. Pobangondon bo hukumdon in bangusa mita, dikabí motabi kon intau mita moraat inta ain nonoḻikud.

⁷Kon dodai in ḷoḷabungneadon mobui in mosia, mogoob naonda bo ungkú sindaḷan moḻibu kon kotá.

⁸Mosia in tantúbí monigid bo moningkuḻe; tosingogon monia in moḷanit naonda bo kedang, kai monia kamai diábí in mokodongog.

⁹Táe kinosingan-Mubí in mosia, o TUHAN, bayongan in bangusa tatua in siningkuḻe-Mu.

¹⁰Ikobí in pangkoi in ropotku, akuoi in mongamang mako kon ini-Mu, Iko in tampat poḷoḷaguianku, o Allah.

¹¹Popisí in kopopia-Nea ki Allahku in namangoi kon inakó, Pinomayá-Nea mako in akuoi nokoontong kon musungku sinaḷow.

¹²Dikabí moḻimod kon i monia, o TUHAN, sinbá bangusaku diá mokoḻiong. Poraritdon bo upetdon in mosia podoyon kon kawasa-Mu, o TUHAN mogogoḻingoi nami.

¹³Sin mosia in binaradosa pinongin tosingogon monia; biódon mako in mosia moibaaḷ kon bonu in ḷoḷatúnea, sin mosia in moibog mogodi-godi bo monguboḷ.

¹⁴Yopúdon in mosia kon bonu in torú-Mu, o Allah, yompatdon in mosia kodaiton. Dá bayongan in intau monotaaudon kon ki Allah in nomarenta kon Israel, bo pinomarentaan-Nea in modugang modapot in sinangkub in butá.

¹⁵Kon dodai in ḷoḷabungnea mobui in mosia, mogaú naonda bo ungkú sindaḷan moḻibu kon kotá.

¹⁶Mosia in modondaḷoi motayak kon kaanon, bo mogayow aka diá mobotug.

¹⁷Táe akuoi in mopodondong in ropot-Mu; pomuḷoi in doḷo-doḷom moḷangon in dondongku mopodondong in tabi bo kososatia-Mu. Sin Ikobí in pososingayowanku, pononiunganku kon dodai in mosusa.

¹⁸O Allah, pangkoi in ropotku, podondongku in dodayow mita kon ini-Mu, sin Ikobí in pononiunganku. O Allah, inta motabi kon inakó.