Read Mongondow MAZMUR 60 Bible Online

MAZMUR 60 - Mongondow bible

MAZMUR 60

¹Kon i itoi in mododondong. Podudui in dondong: Bungang bakung kosakusian. Mazmur topotundú nongkon i Daud,

²kon tungkuḷ in sia nomarang kon in Aram-Mesopotamia bo intau in Aram-Zoba, bo kon dodai in ki Yoab nobui bo nonaḷow kon 12.000 in intau in Edom kon Ḷopá in Asin.

³Iko in nondoí kon inami, [31] o Allah, bo nopomayá mako kon inami sinaḷow. Iko in sinumorú kon inami; tanaa in tompiadon bui in kami.

⁴Iko in nodandú kon butá dá noḷau; tompiadon in inta nongobotak, popisí in butá nodandú.

⁵Pinomayá-Mu mako in umat-Mu nokorasa kon roriga mobogat; kami in noipape magí-mako naonda bo intau noḷoḷangu.

⁶Inogoian-Mu in tompoingat in intau mita inta mopirisaya, sinbá mosia moiḷagui kon hukuman.

⁷Posaḷamatdon in kami in kawasa-Mu, tubagaidon in sambayang nami, sinbá intau mita inta kinotabi-Mu in posaḷamaton.

⁸Nongkon pinogutunan-Nea inta motusi ki Allah in noguman, “Akuoi in moibog monggiow bo mosilai kon butá in Sikhem; Ḷopá in Sukot in undion-Ku.

⁹Gilead bo Manasye Akuoi in kitogi, Epraim in sapoyo uwaja-Ku, bo Yohuda in tungkud in dodatuan-Ku.

¹⁰Táe Moab in pomomataan-Ku kon sioḷ; Akuoi in monggiow kon kinountungan kon Pilistea. Edom in pinopogambatan-Ku in aip in sioḷ-Ku nobaḻí tomponuot kon sia in Akuoi in kitogi.”

¹¹Ki ine in modia kon inakó mayá in Edom? Ki ine in mokapit kon inakó mayá in kotá kobenteng tatua?

¹²O Allah, diá degá in Iko noyotakin nami? Diá degá in Iko mayá moparang takin tontara nami?

¹³Tuḷungaipa in kami nongkon musung, sin totuḷung in intau diá in mangaḻenea.

¹⁴Moyotakin i Allah, kita in motorindogbí, Siabí tua in monaḷow kon musung.