Read Mongondow MAZMUR 61 Bible Online

MAZMUR 61 - Mongondow bible

MAZMUR 61

¹Kon in itoi in mododondong. Pongin ito-itog kecapi. Nongkon i Daud.

²Indongogaipa kaasí in kuaniku, o Allah, taridiaipa in sambayangku.

³Noyayú nongkon baḷoi akuoi in mokuani kon ini-Mu, sin akuoi in kinodaitandon in kamang. Iko in mogatodbí kon inakó mayá in pogogadopan inta moaman, tampat inta totuu moḷantud kon inakó;

⁴sin Ikobí in mogogoḻiungku, poḷoḷukadan inta moropot nongkon musungku.

⁵Biódon mako in akuoi kinoouput in kobiaganku mogutun kon ḷoḷaigan-Mu, sinbá moaman kon bonu in oḻiung in koḻikip-Mu.

⁶Sin Iko in nokidongogdon kon dandiku, o Allah, bo nobogoi kon inakó in budel in intau inta mopirisaya.

⁷Igumon mako ki datu moumur in kobiagan, dá mobiag in sia modapot in inanakan.

⁸Igumon mako momarenta in sia modapot in mononoi saḷaku datu inta piniḻí-Mu, o Allah, Oḻiungaidon in sia in tabi bo kososatia-Mu.

⁹Dá akuoi in umuran mopodondong in dodayow kon ini-Mu, poḷat mogintompod kon dandiku pomuḷoi in singgai.