Read Mongondow MAZMUR 64 Bible Online

MAZMUR 64 - Mongondow bible

MAZMUR 64

¹Kon i itoi in mododondong. Mazmur i Daud.

²O Allah, indongogaipa kaasí in sambayangku kon tungkuḷ in umaan susa, posaḷamatpa in nyawaku nongkon musung inta mokoondok.

³Oḻingoiaipa in akuoi nongkon pinoyopopogan in intau moromú, nongkon tomayá molicik in intau mita moraat.

⁴Dilá monia iḷanitan monia ná koḷanit in kedang, bo mopoyaput in tosingogon mita moḻingá naonda bo piot.

⁵Nongkon pinogadopannea mosia in mopoyaput in ouman mita uboḷ, diábí in ondok monia moponapud in uboḷ kon intau inta diá kotaḷá.

⁶Mosia in umuranbí kumadai totok kon niatnea inta moraat, bo mongonguman motaan kon poyogaḷap; kai monia kamai dá diábí in nokoontong.

⁷Mosia in nonomayá kon inta moraat, bo noguman, “Kami in nonomayá kon inta diá mopia.” Gina bo raian in intau totok in modaḷom, diábí kodoḷopan.

⁸Táe ki Allah in nopopiotbí in piot-Nea kon i monia, bo indoianmai notompaḻí in mosia.

⁹Mosia in noyopú popisí in tosingogon monia tontaní; bayongan inta nokoontong kon inia nomombiḻing.

¹⁰Bo bayongan in intau angoiandon in ondok; mosia in moraidon kon oaidan i Allah bo mopotaa-taau mako kon onu inta ain inaidan-Nea.

¹¹Dá bayongan in intau mopia in moḷungangabí in gina popisí in onu inta pinomia i TUHAN. Mosia in moniungbí kon i-Nia; bayongan in intau motuḻid in gina in moyunggagábí.