Read Mongondow MAZMUR 7 Bible Online

MAZMUR 7 - Mongondow bible

MAZMUR 7

¹Amui i Daud, inta pinodondong kon i TUHAN popisí in ki Kus, intau in Benyamin tatua.

²Oo TUHAN Allahku, akuoi in moniung kon ini-Mu; posaḷamatdon bo poḷuatdon in akuoi nongkon bayongan in intau inta mogaḷo-gaḷow mako kon inakó.

³Dika pomayá mako in mosia naonda bo singa modomok bo mopomorot kon inakó bo diá in motuḷung kon inakó.

⁴O TUHAN Allahku, aka kuma bo akuoi nonombogá, nogaid kon inta moraat kon yobayat, andeka nokoporugimai kon musung takin diá in kinodoyonannea, [5] aka kuma bo inaidanku in natua,

⁶yo pomayádon mako in akuoi inaḷowan bo dinomok in musung, poḷat iḻimod bo sinaḷáan mako natua kon butá.

⁷Sindogdon kon bonu in torú-Mu, o TUHAN, tubagaidon in torú in musungku mita. Sindogdon bo tuḷungai in akuoi, sin iko in motayak kon inta moadil.

⁸Sipundon in bangusa mita kon diug-Mumai, bo kawasaaidon in mosia nongkon tampat pomomarentaan-Mu kon soroga. [6]

⁹Iko in mohakim kon umat intau; pobayádon in inta moadil, o TUHAN, sin diábí kotaḷá in akuoi.

¹⁰Popogogaidon in aid moraat in intau moraat bo irotonaidon in gina in intau mopia, sin Iko in ki Allah inta moadil, inta nonotaau kon gina bo raian in intau.

¹¹Moḷoḷukadku in ki Allah inta moposaḷamat kon intau inta motuḻid in gina.

¹²Ki Allah in hakim inta moadil, inta pomuḷoi mako mohukum kon intau moraat.

¹³Aka dodia monia bo diá mobaḷui, yo sinadia-Nea bidon in pakakat in parang inta mokopatoi. Inatá-Neadon in kedang bo puḷu in piot kinadaian-Neadon, bo poḷat mopopiot in piot-Nea mita inta kodoko-dokot.

¹⁵Indoiaika, intau moraat monomayá kon inta moraat; sia in monomayá kon inta moraat bo monguboḷ.

¹⁶Sia in mongaḻi kon bubú koḷabúan in intau ibanea, táe siabí tontaní in moibonu kon tua.

¹⁷Dá sia in ihukumbí in aidnea tontaní inta moraat, bo iroriga in aidnea tontaní inta moḻingá.

¹⁸Akuoi in mosukur kon i TUHAN sin moadil in Sia, podondongku in dodayow kon i TUHAN, Inta Totok in moḷantud.