Read Mongondow MAZMUR 71 Bible Online

MAZMUR 71 - Mongondow bible

MAZMUR 71

¹O TUHAN, kon ini-Mu in poniunganku, dika pomayá mako in akuoi in pokopooyáanmai.

²Poḷuatdon in akuoi, sin Iko in moadil, indongogaipa bo posaḷamatdon in akuoi.

³Kobaḻídon kon inakó naonda bo buḷud batu pogogutunanku, inta diá moyoyigaku bayáan. Sin sinantú-Mudon kon moposaḷamat kon inakó, Ikobí in pogogadopan bo pononiunganku.

⁴O Allah, pomiḷaguidon in akuoi nongkon intau moraat, nongkon kawasa in intau mita moromú bo moḻingá.

⁵Sin Ikobí in pongamanganku, o TUHAN, TUHAN, akuoi in mopirisaya kon ini-Mu pinangkoi kon noguodpa in akuoi.

⁶Kinoouput in kobiaganku akuoi in kumadai kon ini-Mu; Iko in nogoḻingoi kon inakó [34] pinangkoi kon akuoi pinononggadí dá akuoi in umuranbí modayow kon ini-Mu.

⁷Kobiaganku in nobaḻí dodayanan kon intau mobayong, sin Ikobí in moḷoḷukadku inta moropot.

⁸Akuoi in umuranbí modayow kon ini-Mu, kinoouput in singgai potaauku in koagung-Mu.

⁹Dikabí ḷumbúon-Mu in akuoi kon tungkuḷ in noguyangdon in akuoi dikabí taḷaan kaasí in akuoi aka ropotku in nodaitdon,

¹⁰sin musungku mita in mongongumandon kon inakó, intau mita inta moibog moḻimod kon inakó in noyopopogdon.

¹¹Guman monia, “Sinaḷáandon i Allah in sia; igai aḷowan naton bo domokon in sia, sin diábí in moposaḷamat kon inia.”

¹²Dika in Iko yumayú kon inakó, o Allah, Allahku, ḷagidon tuḷungai in akuoi.

¹³Biódon mako in intau inta monubu kon inakó pokopooyáanmai bo yopúon. Biódon mako in intau inta moibog mopobodito kon inakó motoboḻingo bo ḻibutan in mokooyá.

¹⁴Táe akuoi in umuranbí mongamang mako kon ini-Mu, bo mokakitdon modayow kon ini-Mu.

¹⁵Kinoouput in singgai oumanonkubí in oaidan-Mu mita inta moadil, bo kasaḷamatan nongkon ini-Mu inta diá koiapan.

¹⁶Dayowonku in oaidan-Mu inta motoyang, o TUHAN Allah, powayaku in kooadil-Mu, tongábí kooadil-Mu.

¹⁷O Allah, Iko in notundú kon inakó pinangkoipamai kon akuoi noguodpa, nodapot in tanaa oumanonku in onu inta inaidan-Mu inta mokoherang.

¹⁸O Allah, dika taḷaan in akuoi, modapot in mogoguyang in akuoi bo ubanan, sinbá akuoi in mopotaau in kawasa bo kototoyang-Mu kon bayongan in buí inta moiduduimai.

¹⁹O Allah, kooadil-Mu ná koḷantud in ḷangit; moḷobenbí in oaidan-Mu mita: ki inebí in mokotongkai kon ini-Mu?

²⁰Inogoian-Mu in akuoi in mobayong in roriga mobogat, táe poguḻíon-Mubí in ropotku bo momiag bui kon inakó nongkon pinoḷobongan.

²¹Baḻíon-Mu in akuoi totok in horomaton, bo moḻipoi bui kon inakó.

²²Akuoi in modayowbí kon ini-Mu takin gambus, sin Iko in mosatia, o Allahku. Akuoi in moibogbí mopodondong in dondong dodayow kon ini-Mu takin kecapi, o Allah mokudus in Israel.

²³Akuoi in monggiow takin pia in gina, sindaḷan mopodondong in dodayow kon ini-Mu. Dimukud bo awakku modondong takin pia, sin Iko in noposaḷamatdon kon inakó.

²⁴Kinoouput in singgai popotaaukubí in kooadil-Mu, sin intau mita inta moibog mopobodito kon inakó ain sinaḷow bo pinokopo oyámai.