Read Mongondow MAZMUR 72 Bible Online

MAZMUR 72 - Mongondow bible

MAZMUR 72

¹Nongkon i Salomo. Oo Allah, tundúdon in hukum-Mu kon i datu, ogoiaidon in kooadil-Mu kon i adí ḷoḷaki i datu.

²Igumon mako sia in mohakim kon umat-Mu podudui in hukum, bo mopoaid in inta moadil kon intau inta dinorot.

³Igumon mako butá nami in motomoman bo mobiag motompia, bo inta moadil oyúon kon bayongan in bangusa.

⁴Igumon mako ki TUHAN in moduḷu kon hak in intau inta dinorot, motuḷung kon intau mita nobogá bo moyompat kon intau mita inta nondorot kon i monia.

⁵Igumon mako sia in umuranpa mokotongod modapot in adí bo ompu kon tungkuḷ in oyúonpa in mata in singgai bo buḷan.

⁶Igumon mako sia in naonda bo uyan inta noḷabú kon rawang, naonda bo uyan morogot inta nomuntad kon gobá mita.

⁷Igumon mako kooadil in modugang kon bonu in wakutunea, bo kororomon in moiḻiu kon tungkuḷ in oyúonpa in buḷan.

⁸Dodatuannea in modugang nongkon dagat mopobayá in dagat, moibandang nongkon pomukaan dapot in toyopan.

⁹Intau mita inta nogutun kon padang gurun in mohoromat kon inia bo musung in dumokó kon tayowon in sioḷnea.

¹⁰Datu mita in Tarsis [35] bo ḻibuton mita in modiabí kon sosumba kon inia. Datu mita in Arab bo in Etiopia in mamangoi modia kon iba.

¹¹Bayongan in datu in dumokóbí kon tayowonnea, bayongan in bangusa mobaḻí atanea mita.

¹²Sin sia in mopoḷuat kon intau dinorot inta diádon mokopongonu, bo intau bogá inta mokuani kon inia.

¹³Sia in motabi kon rayat nobogá bo intau biasa, bo moposaḷamat in kobiagan in intau inta diá koonu bo onu.

¹⁴Sia in mopoḷuat kon i monia nongkon pondorotan bo aid mobogat, sin kobiagan monia moḷoben in mangaḻenea kon inia.

¹⁵Mobiagdon in ki Tuang datu! Igumon mako kon inia ogoian in sosumba buḷawan nongkon Arab. Igumon mako sia in sambayangan pomuḷoi mako bo umuran barakatan.

¹⁶Igumon mako gandum in bontu-bonturung kon sinangkub in butá, bo tombuḷudnea mita mopuḻing in bungai in pinomuḷa. Igumon mako butánea in moḷumbá naonda bo Buḷud in Libanon, bo intau in kotánea in modugang naonda bo bonok kon rawang.

¹⁷Igumon mako ki datu in umuran tano-tano bo modapot in mononoi, bo sia in modugangdon totok tango-tangoion kon tungkuḷ in mata in singgai tantúpa oyúon. Igumon mako bangusa mita in mopoigum in barakat naonda bo sia, bo bayongan in intau moguman kon mosanang totok in sia.

¹⁸Dinayo-dayowdon in ki TUHAN, Allah in Israel! Tongábí Sia in mogaid kon inta mokoherang mita.

¹⁹Dinayo-dayowdon in tangoi-Nea inta moḷantud dapot in mononoi; igumon mako sinangkub in butá mopuḻing in kamuliaan-Nea! Natuadon in mobaḻí. Amin!

²⁰Natuata in sambayang mita in Daud, ki adí i Isai.