Read Mongondow MAZMUR 73 Bible Online

MAZMUR 73 - Mongondow bible

MAZMUR 73

¹Mazmur i Asap. Totuubí mopia in ki Allah kon umat-Nea, kon intau inta motuḻid in ginanea.

²Táe noḻiaidon in ginaku, pirisayaku in gogiódon bo moinggamá,

³sin mointoi in akuoi kon intau inta mododia, kon dodai in akuoi mokoontong kon kauntungan in intau moraat.

⁴Sin mosia in diábí nokorasa kon takit, awak monia in moropot bo mosehat.

⁵Mosia in diábí nobaba kon susa, diábí kinoantugan in nahat ná intau ibanea.

⁶Tuamai in mosia dumodia, bo umuran mogaid kon inta moromú.

⁷Nongkon gina monia moiḷuai in moraat; [36] mosia in tongábí tantú morai kon tomayá mita moraat.

⁸Mosia in morebeg bo moposingo-singogmai, bo takin ḷoḷatú mosia in mogogondok bo mondorot.

⁹Mosia in mohojat kon i Allah kon soroga, bo mongambungangaḷ kon intau mita kon dunia,

¹⁰dá umat i Allah in mobui domandon kon i monia,[37] bo mopirisaya kon singog monia.

¹¹Guman monia, “Diábí kinotaauan i Allah, Ki Inta Totok in Moḷantud diábí nomangaḻe.”

¹²Natuata in kaadaan in intau moraat; kobobiagnea in moodom, kapunyaannea in tantú modugang.

¹³Diábí in mangaḻenea in akuoi moḷukad sinbá ginaku modarit; diábí in mangaḻenea in akuoi yumayú kon dosa.

¹⁴Sin kinoouput in singgai akuoi koantugan in nahat; pomuḷoi in doḷo-doḷom akuoi rorigaan.

¹⁵Aka kuma bo akuoi in moguman natua, yo akuoi in nonoḻikudon kon adímu mita.

¹⁶Táe kon tungkuḷ in akuoi noḷongasi momangaḻe, tua in totokbí in mororigaku raion.

¹⁷Imbuitnea sinumuot in akuoi kon Baḷoi i TUHAN, bo kinomangaḻeankudon in imbuit in intau moraat.

¹⁸Pinotabá-Mu in mosia nongin daḷan inta morondog, bo pinomayá-Mu mako in mosia in moḷabú bo matoi.

¹⁹Tongá kon bonu in tokokiap morimumud in mosia, totuubí motoyang in kopaḷutan monia.

²⁰Naonda bo togoindop inta noinggamá kon tungkuḷ in doḷo-doḷom; kon dodai in Iko sinimindog, o TUHAN, yo noinggamádon in mosia.

²¹Kon tungkuḷ in moyaat in ginaku bo naonda bo tura-turakon,

²²nobodok in akuoi bo diá momangaḻe, akuoi naa in naonda bo mahaḷuk kon tayowon-Mu.

²³Táe akuoi in umuranbí kon diug-Mu, kinadaian-Mu in ḻimaku koḷanan.

²⁴Kinapit-Mu in akuoi in tonggina, bo sinarima-Mu in akuoi takin horomat kon singgai moiduduimai.

²⁵Ki inebí in kapunyaanku kon soroga koḻikudbí in Iko? Tongábí Iko diábí in ibanea mako in koibogku in kon butá.

²⁶Umpaka dimukud bo awakku in moḻemédon, Ikobí in ropotku, o Allah; Ikobí in kapunyaanku modapot in mononoi.

²⁷Intau inta monaḷámai kon ini-Mu in moboditobí, Iyopú-Mu in intau inta diá motoḷutui kon ini-Mu.

²⁸Táe aka kon inakó yo totuubí kon mopia in kon diug i Allah, TUHAN Allah in baḻíonku pononiunganku, sinbá motaau in akuoi mopotaa-taau mako in bayongan inta inaidan-Nea.