Read Mongondow MAZMUR 75 Bible Online

MAZMUR 75 - Mongondow bible

MAZMUR 75

¹Kon i itoi in mododondong. Podudui in dondong: Dika moyopú. Mazmur i Asap. Dondong.

²Kami in mosumba kon ini-Mu, o Allah, kami in mopoyaput in sukur kon ini-Mu bo mopotaau in oaidan-Mu inta mokotongaw.

³Ki Allah in noguman, “Kon wakutu inta sinantú-Ku, Akuoi in mohakimbí koadilon.

⁴Aka butá naa modandú takin bayongan mogogutunnea Akuoibí in noginrigon kon oiginea mita.”

⁵Kon intau inta moambungangaḷ, akuoi in moguman sinbá dikadon mongambungangaḷ bui.

⁶Bo kon intau moraat, sinbá dikadon dumodia. Dika yumunggagá andeka ḷumoḷatú in mongonguman.

⁷Sin pohakiman in diábí mamangoi nongkon pomukaan andeka toyopan deemanbí doman nongkon utuan andeka toḷatan. [39]

⁸Táe ki Allahbí tontaní in mohakim, Sia in mopoompá kon tobatú bo mopoḷantud kon ibanea.

⁹Torú i TUHAN naonda bo piala kon ḻima-Nea, piala tatua in binonuan in tubig in anggur inta mokoḷoḷangu. Ki Allah in nopobutak in bonunea, bayongan in intau moraat kon dunia musti monginum dapot in modait.

¹⁰Táe akuoi in umuranbí mopotaau in Allah i Yakub, mopodondong in dodayow kon i-Nia.

¹¹Putoḷan-Neabí in ropot in intau moraat, táe intau mopia in modugangbí moropot.