Read Mongondow MAZMUR 76 Bible Online

MAZMUR 76 - Mongondow bible

MAZMUR 76

¹Kon i itoi in mododondong. Takin ito-itog kecapi. Mazmur i Asap. Dondong.

²Ki Allah in ponango-nangoian kon Yohuda; tangoi-Nea in noiwayadon kon Israel.

³Yerusalem in pogogogaian-Nea; Tombuḷud in Sion in pogogutunan-Nea.

⁴Kon tua irimumud-Nea in bayongan pakakat in parang, bayongan piot mopouḻi-uḻinag, kaḻeaw bo kedang.

⁵Totuubí kon moḷantud in Iko, bo momulia, noiḻiubí kon buḷud mita dungkuḷmai.

⁶Intau mita mobarani ain pinogagowan; mosia in noisiug bidon bo diádon mobangon bui. Tontara mita inta mongotorindog noinggamádon in ropotnea.

⁷Bayongan in kabaḷo bo tumotakoinea noḷabú minatoi in guak-Mu, o Allah Yakub!

⁸Totuubí kon motoyang in Iko! Aka tumorú in Iko, ki ine in mokoigon?

⁹Nongkon ḷangit Iko moponiata in onu in sinantú-Mu; butá moondok bo kibio-biómai.

¹⁰Kon tungkuḷ in Iko simindog sin monisigdon sin moposaḷamat kon intau inta dinorot kon dunia.

¹¹Umpaka intau mita inta totok in moḻingá modayow kon ini-Mu, bo inta sinumorúpa in momaké in kaeng karong tomponuot nonogumatoi.

¹²Intompodaidon in dandimu kon i TUHAN Allahmu. Bayongan bangusa inta nogutun kon diugmai in modia kon sosumba kon i Allah inta kinoondok.

¹³Sia in monginggamá kon ibog in pongawasa mita; datu mita angoian in ondok kon i-Nia.