Read Mongondow MAZMUR 77 Bible Online

MAZMUR 77 - Mongondow bible

MAZMUR 77

¹Kon i itoi in mododondong. Podudui in: Yedutan. Mazmur i Asap.

²Noḷangon in pinokokuaniku kon i Allah; noḷangon in kuaniku, bo inindongogan-Nea in akuoi.

³Kon tungkuḷ in mororiga totok akuoi in nosambayang kon i TUHAN; kinoouput in doḷom tonggóonku in ḻimaku kon i-Nia takin diá angoian in bú, táe ginaku in doíbí ḻipoion.

⁴Aka kotoropanku in ki Allah, mogamui in akuoi, aka tano-tano bo ku, ginaku modugang moḻemé.

⁵Binaḻí i TUHAN in akuoi diá mokosiug kon dodai in doḷom, moḻia-ḻiaw in ginaku dá diádon mokosingog.

⁶Iraiku kon singgai mita inta ain kinotaḻiban, toro-toroponku bo tano-tanobonku in taong mita inta ain kinotaḻiban.

⁷Kon dodai in doḷom akuoi in moporai-raimai, bo mopoḻibo-ḻibómai kon bonu in gina,

⁸“Degá dapot in mononoi ki TUHAN in mondoí bo diádon angoian pia in gina bui?

⁹Degá nogogaidon in Sia motabi kon inami? Degá diádon intompodan-Nea in dandi-Nea bui?

¹⁰Degá kinoḻiongandon i Allah in monotabi? Sinumorúdon degá in Sia, nodapot in Sia diádon in tabi-Nea?”

¹¹Bo akuoi in noguman, “Naabí in mokonakit kon ginaku, kon ki Inta Totok in Moḷantud diádon nongawasa bui.” [40]

¹²Akuoi in moibog monorop kon inta inaidan-Mu mita o TUHAN, monanob kon inta mokoherang mita inta inaidan-Mu dungkuḷmai.

¹³Akuoi in moibogbí monano-nanob kon bayongan inta pinomia-Mu, bo umuran morai kon bayongan inta binaḻí-Mu inta motoyang.

¹⁴O Allah, bayongan in aid-Mu in motusi, ki inebí in ná koḷoben i Allah nami?

¹⁵Ikobí in ki Allah inta nomia kon inta mokoherang, kawasa-Mu ain pinoniata-Mu kon yuak in bangusa mita.

¹⁶Pinongin ropot-Mu pinoḷuat-Mu in umat-Mu, buí i Yakub bo i Yusup.

¹⁷Mokoontong kon ini-Mu, o Allah, tubig moondok, nodapot in apad in dagat mourot.

¹⁸Goḷom mopoḷabú in uyan, gotup mondoradá; kilat monampí magí mako.

¹⁹Gotup mondoradá, kilat in moburiang mako, butá modandú bo mourot.

²⁰Iko in mayá nongin bokoḷ, iḷumoḷan kon dagat, táe ḻiod-Mu diá koontongan.

²¹Naonda bo gombala Iko in nodia kon umat-Mu, pinotonsigad kon i Musa bo kon i Harun.