Read Mongondow MAZMUR 78 Bible Online

MAZMUR 78 - Mongondow bible

MAZMUR 78

¹Dondong topotundú i Asap. Indongogaidon in totundúku, ei bangusaku, taridiaidon in tosingogonku mita.

²Akuoi in moibog mopoyaput in tangkí bo poumpamaan, bo moginsilang kon tangkí dungkuḷmai,

³soaḷ mita inta dinongog bo inta sinarima nami, inta inouman in mogoguyang nami.

⁴Diábí bunion nami intua kon i adí mita nami; kami in mopotaaubí kon intau mita inta moiduduimai kon naonda in kawasa i TUHAN bo bayongan inta binaḻí-Nea inta moḷoben, takin aid-Nea mita inta mokoherang.

⁵Kon bangusa in Israel inogoi-Nea in hukum-Nea, bo kon buí i Yakub in parenta-Nea. Sia in nopotabá kon mogoguyang naton motundú kon tua kon i adí mita monia,

⁶sinbá bui moiduduimai monotaau kon i-Nia, bodongka ingguputan tundúon kon i adí mita monia.

⁷Takin natua mosia doman in mongamang kon i Allah, bo diá mokoḻiong kon onu inta inaidan-Nea, táe umuran motoindudui kon parenta-Nea,

⁸sinbá mosia diá naonda bo mogoguyang monia inta moibog momarontak bo monaḷámai; bui inta noḻiai in pirisayanea, bo diá motoḷutui kon i Allah.

⁹Suku in Epraim inta sinompakakatan in piot bo puḷunea, noḷagui kon tungkuḷ in noparang.

¹⁰Mosia in iḻimimpat kon dodandian i Allah takin i monia, bo doí sinumoḷutui kon hukum-Nea.

¹¹Kinoḻiongan monia in bayongan inta pinomia-Nea, bo inta mokoherang mita inta pinoniata-Nea kon i monia.

¹²Kon tayowon in mogoguyang monia, ki Allah nomia kon inta mokoherang kon butá in Mesir, kon ḷopá in Zoan.

¹³Binotak-Nea in dagat, bodongka nopoḷoḷan kon i monia; tubig pinosindog-Nea naonda bo dinimpot.

¹⁴Sia in nodia kon i monia inoḻiungan in goḷom kon dodai in singgai bo sinimbayagan in tuḷú kinoouput in doḷom.

¹⁵Binotak-Nea in buḷud batu kon padang gurun, bo nopoinum kon i monia nodapot in noiḻiu kon noguḻí in rogang.

¹⁶Tombuḷud batu pinotabá-Nea nopoḷuai in tubig, bo nopoiḻig magí in tubig naonda bo ongkag.

¹⁷Táe mosia in umuranbí nogaid kon dosa kon tayowon i Allah, kon rawang nomarontak in mosia kon i Inta Totok in moḷantud.

¹⁸Mosia in sinumontuonbí nonungkuḷ kon i Allah, pinongin monuntut kon kaanon inta kinoibog monia.

¹⁹Mosia in noḷawang kon i Allah takin tosingogon, “Mokotongod degá in ki Allah in mopokaan kon inaton kon padang gurun?

²⁰Totuubí kon binobakan-Nea in buḷud batu inta motogat, dá iḻumuai noitampurang norogot in tubig. Táe mokopooyúon doman degá in Sia kon roti bo mobogoi in ponoyá kon umat-Nea?”

²¹Nokodongogmai kon tua, sinumorú in ki Allah bo sinubu-Nea in tuḷú in umat-Nea; torú-Nea kon i monia totokdon in sinumagab,

²²sin diá mopirisaya in mosia kon i Allah, kon kawasa-Nea inta mokosaḷamat kon i monia.

²³Umpaka natua pinarentaan-Nea in ḷangit sinbá momukat kon ngaranea mita.

²⁴Pinoonag-Nea in gandum nongkon soroga, manna [41] ogoi kaanon monia.

²⁵Inogoian-Nea in mosia in kaanon inta mobayong totok; mosia in nokaan kon roti in malaekat.

²⁶Pinoki pogirupan-Nea in tompot in pomukaan; pinongin kawasa-Nea tompot in toḷatan nogirup.

²⁷Pinopoponag-Nea in ḷagapan mita mamangoi kon umat-Nea, kobayongnea in nádon onda bo bungaion diá koiapan.

²⁸Pinoḷabú-Nea in ḷagapan mita tatua kon pinononḷoḷaigan kon ḻibumai in pinogutunan monia.

²⁹Bo nongaandon in mosia nodapot in nobotug, sin inogoidon i Allah in onu in kinoibog monia.

³⁰Táe ibog monia in diápa doman kinooropan; dá koyogot in mosia mongaanmai,

³¹sinumorú in ki Allah bo noḷawang kon i monia; iḻimod-Nea in intau mita in Israel inta nobagupa bo inta motorindog.

³²Umpaka natua umat-Nea in tantúpabí doman nogaid kon dosa, inta mokoherang mita diábí nokopomuká kon pirisaya monia.

³³Dá inimbuitandon i Allah in kobiagan monia naonda bo poginaan, taong mita monia in nodait kon bonu in ondok.

³⁴Pomuḷoi in ki Allah moḻimod kon tongonumai in kon sigad monia, ibanea in momanasaḷ bo mobui mangoi kon i-Nia.

³⁵Mosia in nokotorop kon ki Allah in moḷoḷukad monia, bo ki Inta Totok in Moḷantud in mopoposaḷamat monia.

³⁶Táe mosia in nongakaḷ kon i-Nia, tosingogon mita monia komintan uboḷ.

³⁷Mosia in diábí motoindudui kon i-Nia bo diá kinumadai kon dodandian-Nea.

³⁸Táe ki Allah in notabi bo nongampung kon umat-Nea, bo diábí noyopú kon i monia. Nopobui-buimai Sia in nomondam kon torú-Nea, bo diá noponiata in yaat in gina-Nea.

³⁹Kinotoropan-Nea kon mosia in tongábí mahaḷuk inta mato-matoi, naonda bo tompot inta noitaḻib bo diá bidon mobui mangoi.

⁴⁰Totuu mokakit in mosia in momarontak kon i-Nia, bo moposakí in gina-Nea kon tungkuḷ in kon padang gurun.

⁴¹Mopobui-buimai in mosia monungkuḷ kon i Allah, moposusamai kon i Inta Mokudus, ki Allah in Israel.

⁴²Mosia in diádon nokotorop kon kawasa-Nea, kon singgai pinopoḷuatan-Nea kon i monia nongkon musung,

⁴³kon tungkuḷ in Sia nogaid kon inta mokoherang mita kon Mesir, bo mujizat mita kon rawang in Zoan.

⁴⁴Ongkag mita monia binaḻí-Nea dugú, dá diá motaau in mosia monginum kon tubignea.

⁴⁵Pinosikisa-Nea in mosia in ḷangow mobayong, bo nopomayá mako in butá monia pinoguyaat in tumpaḷak.

⁴⁶Sia in nopoangoi in uḷod bo pangkoḷá, inta nokaan nokopodait kon bungai in boyó kon gobá.

⁴⁷Sia in nomoguyaat kon pangkoi in anggur monia pinongin uyan batu, bo pangkoi mita in ara monia pinoguyaat in oḷú inta nongokompoḷ.

⁴⁸Sia in nopomayá mako in uyan eis noidodot kon bobiagon monia, bo gotup [42] nonanut kon bobiagon mita monia.

⁴⁹Sia in nopouma in torú-Nea inta modoko-dokot takin nopotabá mangoi in tongopaanan in malaekat momomatoi inta nokopobaḻí kon i monia kinobuḻian in kamang.

⁵⁰Sia in diábí nonahang kon torú-Nea andeka notabi kon kobiagan monia, táe noyopú kon i monia pinongin takit dumodakit.

⁵¹Sia in noḻimod kon adí mita guya-guyang kon batúan in motoḷuadí in Mesir.

⁵²Bo Sia in nodia kon umat-Nea naonda bo paanan in domba, bo nodia kon i monia nongin padang gurun.

⁵³Kon bonu in tongganut-Nea moaman in mosia bo diá moondok, umpaka musung monia noḷomot kon bonu in dagat.

⁵⁴Bo umat-Nea in dinia-Nea kon butá-Nea inta motusi, kon buḷud inta inagow-Nea tontaní.

⁵⁵Kon tayowon in umat-Nea Sia nopoguntun in intau inta nogutun kon tua bodongka sinila-silai-Neadon in butá tatua kon bayongan in suku in bangusa in Israel, umat-Nea, dá mosia in motaaudon mogutun kon ḷoḷaigan mita in musung.

⁵⁶Táe nomarontak in mosia bo nonungkuḷ kon i Allah Inta Totok in Moḷantud, parenta-Nea mita diá dinuduian monia.

⁵⁷Mosia in nonoḻikud ná muna monik monia, bo diá motaau pirisayaan naonda bo puḷu in piot inta nobelung.

⁵⁸Mosia in noponontot kon i Allah in tampat pososumbaan kon berhala, bo pinointoi monia in Sia in patong mita monia.

⁵⁹Nokoontongmai kon tua, ki Allah in sinumorú totok, bo nondoídon mako natua kon i monia.

⁶⁰Sia in nonaḷámai kon ḷoḷaigan-Nea kon Silo, [43] Tampat pogogutunan-Nea kon sigad in intau.

⁶¹Pinomayá-Nea mako in Poti Dodandian-Nea dinakop; lambang in kamuliaan-Nea inagow in musung.

⁶²Sinumorú in Sia kon umat-Nea, kapunyaan-Nea inta piniḻí-Nea, bo binió-Nea mako in mosia iḻimod in kedang.

⁶³Tayowmobiag mita monia pinokak in tuḷú; diá in mononibuḷoi kon mongodeaga mita monia.

⁶⁴Imang mita monia iḻimod in kedang, boba-bobay mita monia diá mokopogamui.

⁶⁵Dá sinimindog in ki TUHAN naonda bo intau bagu nobangon kon pinosiugan, naonda bo intau moropot nopaḷut nonginum kon anggur.

⁶⁶Sia in nomongkug kon musung-Nea nodapot in inumundok, bo nonaḷow kon i monia modapot in mononoi.

⁶⁷Táe inindoí-Nea in buí i Yusup bo diábí piniḻí-Nea in suku i Epraim.

⁶⁸Sukubí in Yohuda in piniḻí-Nea, bo Tombuḷud in Sion inta kinotabi-Nea.

⁶⁹Sia in noposindog in Baḷoi-Nea naonda bo pinogutunan-Nea kon soroga, bo naonda bo butá, noroton nodapot in mononoi.

⁷⁰Sia in nomiḻí kon i Daud mogogundoi-Nea bo nogamá kon inia nongkon yua-yuak in bobiagon,

⁷¹nongkon tampat pinomiagan kon ki iná in domba, sin moḷukad kon Israel umat-Nea.

⁷²Ki Daud in noḷukad kon i monia takin tuḻid in gina, bo kinapitnea in mosia kinopia-pia mako.