Read Mongondow MAZMUR 80 Bible Online

MAZMUR 80 - Mongondow bible

MAZMUR 80

¹Kon i itoi in mododondong. Podudui in dondong: Bungang bakung. Mazmur kosakusian i Asap.

²O Gombala in Israel, indongogaipa kaasí, Iko in nodia kon buí i Yusup saḷaku paanan. Iko in iḻimitú kon tudu in kerub, [44] angoidon takin bayag

³kon tayowon i Epraim, i Benyamin bo i Manasye. Poontongdon in kawasa-Mu kon inami, bo angoidon moposaḷamat kon inami.

⁴O Allah, tompiadon bui in kami; bobuipa kaasí in kami takin pia in gina, dá mosaḷamat in kami.

⁵O TUHAN Allah Inta Totok in mokawasa, dapot in toonu Iko in tumorú, umpaka umat-Mu mosambayang?

⁶Inogoi-Mu kon inami in uwang mobaḻí kaanon, bo ḷuá mobayong in oinumon.

⁷Pinomayá-Mu mako in bangusa mita topodiugmai nobobayowan soaḷ butá nami musung mita nami in kinumosing takin ḷunganga in gina.

⁸O Allah Inta Totok in mokawasa, tompiadon bui in kami; bobuidon in kami takin pia in gina, sinbá mosaḷamat in kami.

⁹Umat-Mu in naonda bo pangkoi in anggur inta pinamping-Mu nongkon Mesir. Bangusa mita ibanea inuntun-Mu, bo pinomuḷa-Mu in pangkoi mita in kayu tatua kon butá monia.

¹⁰Iko in noposadia in butá kon inia; dá nonguakat in sia nokopoonag bo noiḷandai kon sinangkub in butá.

¹¹Sia in nogoḻiung kon tombuḷud mita bo tanganea mita in noikoḷobdon kon pangkoi mita in aras inta moḷoben totok.

¹²Tanganea in noiḷandai nodapot kon Dagat Toyuak, ḷuntungnea mita in noidapot kon Ongkag in Eprat.

¹³O Allah, nongonu sin inumpag-Mubí in tondoknea, dá pomuḷoi in intau inta moitaḻib motaaudon mosipú kon bungainea?

¹⁴Boké in kayuon moranut modapot in mogoguyaat, bo mahaḷuk kon rawang mokaan kon tua.

¹⁵O Allah Inta Totok in mokawasa, angoidon bui, bobuidon nongkon soroga bo taridiaidon in umat-Mu.

¹⁶Posaḷamatdon in umat inta naonda bo pangkoi in anggur ain pinomuḷa-Mu tontaní, bo tokat in anggur inta binaḻí-Mudon noropot.

¹⁷Musung ain nomupuḷ bo noturub kon inia; biódon mako mosia in yopúon in torú-Mu.

¹⁸Oḻiungaidon in intau inta ain piniḻí-Mu, ki adí in intau inta ain iniropotan-Mu kon ini-Mu.

¹⁹Dá diádon in kami ḻimimpat kon ini-Mu; ḷukadaidon in kobiagan nami, dá kami in modayowbí kon ini-Mu.

²⁰O TUHAN Allah Inta Totok in Mokawasa, tompiadon bui in kami, bobuidon takin pia in gina, sinbá mosaḷamat in kami.