Read Mongondow MAZMUR 81 Bible Online

MAZMUR 81 - Mongondow bible

MAZMUR 81

¹Kon i itoi in mododondong. Podudui in dondong: Gitit. Nongkon i Asap.

²Podondongdon in dondong dodayow kon i Allah, ropot naton, porogiowdon takin sanang in gina kon i Allah i Yakub.

³Tobogdon in rebana, pododondongdon in dondong, kutidon in gambus bo kecapi kopiaan.

⁴Irupdon in torompet kon singgai moḷoben naton, kon bobutungan buḷan mobagu bo buḷan moḷoben.

⁵Sin tua in tobatú atorang kon Israel, tobatú parenta nongkon i Allah i Yakub.

⁶Binaḻí-Nea tobatú tompoingat kon bangusa in Israel, kon dodai in Sia noḷawang kon Mesir. Akuoi in nokodongog kon tosingogon inta diá kinotaauanku,

⁷“Ininggamáan-Kudon in onu inta pinotaanmu, bo noḷuat doman kon karansi inta sinombuḻiganmu.

⁸Kon bonu in susamu moiko in mokuani, bo Akuoi in noposaḷamat kon i monimu. Sinubagan-Ku in moiko nongkon gotup tampat inta pinogadopan-Ku, Sinungkuḷan-Ku in moiko kon bokaká in tubig Meriba.

⁹Indongogaidon in toingat-Ku, ei umat-Ku, Israel, aka kuma bo moiko moibog mokidongog kon i-Nakó!

¹⁰Dikabí in oyúon in kon sigadmu in ilah ibanea, dikabí mosumba kon ilah ibanea.

¹¹Akuoibí in ki TUHAN Allahmu, inta nodia kon i monimu iḻumuai nongkon Mesir. Kon dodai in moiko ginogoi moiko inogoian-Ku in kaanon.

¹²Táe umat-Ku in doí mokidongog kon i-Nakó, Israel in doí motoindudui kon i-Nakó.

¹³Tuamai in pinomayá-Kudon mako in mosia motogat in gina; biódon mako in mosia in dumudui kon ibog monia tontaní.

¹⁴Ah, aka kuma bo umat-Ku moibog mokidongog kon i-Nakó, aka kuma bo mosia moibog tumoindudui kon i-Nakó,

¹⁵dá ḷagi-Kudon pokuyungon in musung monia, bo monaḷow kon bayongan in ḷawang monia.

¹⁶Intau inta mondoí kon i-Nakó in potungkudon-Kubí, mosia in hukumonbí modapot in mononoi.

¹⁷Táe umat-Ku in pokaanon-Kubí in gandum inta notompiḻí, bo botugan-Ku in biluk in kayuon.”