Read Mongondow MAZMUR 84 Bible Online

MAZMUR 84 - Mongondow bible

MAZMUR 84

¹Kon i itoi in mododondong. Podudui in dondong: Gitit. Mazmur in inanakan i Korah.

²Totuu mokosanang in tampat pogogutunan-Mu, o Allah Inta Totok in mokawasa!

³Ginaku in totokbí in mokotanob kon Baḷoi-Mu, dimukud bo awakku monggiow kon i Allah inta nobiag.

⁴Nodapot in ḷagapan dui-duit nokouḻí kon baḷoi bo ḷagapan tansibí in nokouḻí kon pugad, tampat pogogukatan monia kon i adínea kon diug in mezbah-Mu, o TUHAN Inta Totok in mokawasa, Datuku bo Allahku.

⁵Totuu mosanang in intau inta nogutun kon Baḷoi-Mu, bo umuran mopodondong in dodayow kon ini-Mu.

⁶Pia in kamang in intau inta nokouḻí kon ropot nongkon ini-Mu, bo inta koniat mayá mosambayang kon Buḷud in Sion.

⁷Kon dodai in mosia minayá nongin ḷopá Mononoi, tampat tatua binaḷuian monia nobaḻí bokaká, uyan dungkuḷ nobogoi in barakat totuu mobayong.

⁸Ropot monia in kodugang-kodugang, kon tungkuḷ in minayá in Sion, kon tampat i Allah bayongan in dimukud nokipogontong.

⁹Indongogaipa kaasí in sambayangku, o TUHAN Allah Inta Totok in mokawasa, indongogaipa, o Allah Yakub.

¹⁰Barakataipa kaasí in datu nami, o Allah, ḷukadaidon in intau inta ain piniḻí-Mu.

¹¹Mopia-piabí kon tosinggai in kon Baḷoi-Mu dika in toribu nosinggai kon tampat ibanea. Piniḻíku in mobaḻí moḷoḷukad kon ngara in Baḷoi i Allahku dika in mogutun kon baḷoi in intau moraat.

¹²Sin ki TUHAN Allah in moḷoḷukad naton bo datu inta moḷantud, inta noponotabi kon inaton in tabi bo kahoromatan. Sia in diábí kon dodai in onda in nondoí kon onuka in mopia kon intau inta kobobiagnea diá in bogit.

¹³O TUHAN Inta Totok in mokawasa, pia in kamang in intau inta mopirisaya kon ini-Mu.