Read Mongondow MAZMUR 85 Bible Online

MAZMUR 85 - Mongondow bible

MAZMUR 85

¹Kon i itoi in mododondong. Mazmur i inanakan i Korah.

²Kinoibog-Mu in butá-Mu, o TUHAN, kaadaan in Israel ain sinompia-Mu bui.

³Inampungan-Mudon in dosa mita in umat-Mu; imaapan-Mudon in bayongan in taḷánea.

⁴Mosia in diá bidon sinorúan-Mu; torú-Mu inta motoyang in ginamá-Mudon bui.

⁵Tompiadon bui in kami, o Allah mopoposaḷamat nami, dikadon tumorú kon inami.

⁶Modapot degá in mononoi Iko in tumorú kon inami, bo umuran tumorú modapot in adí bo ompu?

⁷Iropotaidon bui in kami sinbá kami umat-Mu in moḷunganga popisí in totuḷung-Mu.

⁸Poontongdon kon Iko in tantúbí monotabi, o TUHAN, ogoiaidon in kami in kasaḷamatan nongkon ini-Mu.

⁹Akuoi in moibog mokidongog kon tosingogon i TUHAN Allah; Sia in nopodandi in kobiagan motompia kon inaton, umat-Nea, asaḷ bo kita in diá bui mogaid kon dosa.

¹⁰Totuu, Sia in moibogbí moposaḷamat kon intau inta modagin kon i-Nia, ki Allah inta moḷantud in mogutunbí kon butá naton.

¹¹Tabi bo kososatia in moyodungkuḷbí, kooadil bo dame in mokokoyotanbí.

¹²Kososatia in intau in mobiagbí nongkon butá, bo kooadil i TUHAN in moḷongowbí monag nongkon ḷangit.

¹³Ki TUHAN in mobogoi kon inta mopia, dá butá naton in mobogoibí in bungainea.

¹⁴Kooadil in umuranbí kon i TUHAN, bo moposadia kon daḷan bayáan-Nea.