Read Mongondow MAZMUR 86 Bible Online

MAZMUR 86 - Mongondow bible

MAZMUR 86

¹Sambayang i Daud. Indongogaipa in sambayangku, o TUHAN, bo tubagaipa in akuoi, sin akuoi nobogá bo moyangkó.

²Ḷukadaipa in kobiaganku, sin Iko in motabi kon inakó, posaḷamatpa in mogogundoi-Mu inta mopirisaya kon ini-Mu.

³Ikobí in ki Allahku, kotabipa kaasí in akuoi o TUHAN, sin kinoouput in singgai akuoi mosambayang kon ini-Mu.

⁴TUHAN, poḷungangadon in gina in mogogundoi-Mu, sin ginaku in popotayowku kon ini-Mu.

⁵Iko in mopia, o TUHAN, bo moibog mongampung, intau inta mosambayang kon ini-Mu umuranbí kotabi-Mu takin tabi inta moiḻiu.

⁶Taridiaipa in sambayangku, o TUHAN, indongogaipa in kuaniku mopoigum in totuḷung.

⁷Kon tungkuḷ nororiga akuoi in nosambayang kon ini-Mu, sin Iko in notubag kon inakó.

⁸O TUHAN, diábí in ilah in ná Iko, diábí in nokoaid kon ná inta inaidan-Mu.

⁹Bayongan in bangusa inta pinomia-Mu in mamangoibí, o TUHAN, sin mosumba kon ini-Mu bo mopoḷantud kon ini-Mu.

¹⁰Sin Iko in motorindog bo nogaid kon inta mokoherang mita, tongábí Iko in Allah.

¹¹Tundúpa in koibog-Mu kon inakó, o TUHAN, sinbá akuoi in dumudui tumoḷutui; baḻídon in akuoi motoguondok totu-totuu kon ini-Mu.

¹²Akuoi in mopoyaput in sukur kon ini-Mu takin ḻimbatú in gina, o TUHAN Allahku; akuoi in modayow kon kawasa-Mu moḷoben modapot in mononoi.

¹³Sin Iko in tantúbí notabi kon inakó takin tabi moḷoben; Iko in noposaḷamatdon kon nyawaku nongkon bubú in poḷoḷobongan.

¹⁴O Allah, intau moḷoḷatú in simindog monubu kon inakó, tongopaanan in intau moḻingá moibog moḻimod kon inakó; mosia in diábí mopandungmai kon ini-Mu.

¹⁵Táe Iko, o TUHAN, ki Allah inta motabi bo mopia in gina, mosabar, nopuḻing in tabi bo mosatia.

¹⁶Taridiaipa kaasí bo kotabipa in akuoi, iropotaidon bo posaḷamatpa in akuoi, sin naonda bo ki ináku, akuoi in nosumba doman kon ini-Mu.

¹⁷Ogoiaidon in akuoi in tomponuot in kopopia-Mu, o TUHAN, sinbá intau inta mondoí kon inakó angoian in oyá, aka mosia in mokoontong kon ini-Mu motuḷung bo moḻipoi kon inakó.