Read Mongondow MAZMUR 90 Bible Online

MAZMUR 90 - Mongondow bible

MAZMUR 90

¹Sambayang i Musa, mogogundoi i Allah. O TUHAN, Ikobí in pononiungan nami modapot kon adí bo ompu.

²Kon dodai in buḷud mita diápa binaḻí, kon dodai in butá bo dunia naa diápa pinomia-Mu, Ikobí in ki Allah inta mononoi, diábí in pinomangkoian bo diábí in imbuitnea.

³Iko in nopotabá kon intau mobui nongkon kinobaḻiannea, mobaḻí ḷobud naonda bo dungkuḷ.

⁴Kon ini-Mu toribu notaong in naonda bo tosinggai, singgai koḷabung inta ain noitaḻib; naonda bo tongooras kon poyoḻimbanan moḷukad kon dodai in doḷom.

⁵Iḷomot-Mu in kami; kami naa in naonda bo togoindop, naonda bo bonok inta nonokat;

⁶doḷo-doḷom mobiag in sia bo ḷumantud, táe moḷaḷow kon dodai in ḷoḷabungnea.

⁷Kami in noitaḻikokog in torú-Mu, bo nodait minatoi in yaat in gina-Mu.

⁸Inukat-Mu in taḷá nami kon tayowon-Mu, dosa nami inta noiadop inontong-Mu.

⁹Kobiagan nami in mopoḷok popisí in torú-Mu, taong mita in kobiagan nami in modait naonda bo tompot poginaan.

¹⁰Kobiagan nami in tongá pitu nopuḷú notaong, aka kami moropot, yo waḷu nopuḷú notaong. Táe tongábí susa bo roriga in mouḻí nami; naonda in mobiag motoyong, kami in diádon.

¹¹Ki ine in nonotaau kon kototoyang in torú-Mu, andeka nomangaḻe kon bungai in torú-Mu?

¹²Degá kinotaauandon nami in kinototoyong in kobiagan naa sinbá kami in mobaḻí intau inta mobijaksana.

¹³O TUHAN, modapot in toonu Iko in tumorú? Pobuidon bo kotabipa in mogogundoi-Mu mita.

¹⁴Poḻiudon in tabi-Mu kon inami pomuḷoi in doḷo-doḷom, sinbá moḷunganga in gina nami bo tantú modondong kinoouput in kinobiagan nami.

¹⁵Ogoiaidon in kami in kamang mopia potongkaion in roriga inta binaba nami kon bonu in taong mita inta nororiga.

¹⁶Poontongdon kon inami inta pinomia-Mu kon inami mogogundoi-Mu mita, bo kawasa-Mu inta mogaga kon buí nami.

¹⁷O TUHAN Allah nami, barakataipa in kami, sinbá bayongan in oaidan nami oyúon in bungainea.