Read Mongondow MAZMUR 91 Bible Online

MAZMUR 91 - Mongondow bible

MAZMUR 91

¹Intau inta nokiḷukad kon i Inta Totok in Moḷantud, bo inta nogutun kon bonu in oḻiung i Inta Totok in Mokawasa,

²in motaaubí in moguman kon i TUHAN, “Ikobí in mododuḷu bo mogogoḻingoiku, Allahku, Ikobí in pirisayaanku.”

³Sia in mopoḷuatbí kon inimu nongkon anib inta noiadop, bo nongkon takit inta mokopatoi.

⁴Iko in koḷoban-Neabí in koḻikip-Nea, dá moodombí in iko kon bonu in oḻiung-Nea; kososatia-Nea in naonda bo kaḻeaw inta noḷukad kon inimu.

⁵Iko in dika moondok kon anib kon dodai in doḷom, andeka daḻí tubuon kon dodai in singgai;

⁶kon bodito inta namangoi nongkon sindip, andeka korimumudan inta moidantug kon tungkuḷ in moutu in singgai.

⁷Umpaka toribu in intau matoi kon símumai bo mopuḷú noribu in kon dotá in koḷananmu, táe iko tontaní in diábí tompaḻían.

⁸Aka iko mobobui magí-mako kon ḻibumumai, yo koontonganmubí in intau moraat kotugatan in tontuḻínea.

⁹Sin ki TUHAN in binaḻímu mododuḷumu, ki Inta Totok in moḷantud binaḻímu mogogoḻingoimu.

¹⁰Dá iko in diábí kotugatan in bodito, baḷoimu in diábí kotugatan in anib.

¹¹Ki Allah in mopotabábí in malaekat-Nea moḷukad kon inimu, sin mogoḻingoi kon inimu kon ondakabí in bayáanmu.

¹²Tamadonbí monia in iko, sinbá sioḷmu in diá moidatong kon batu.

¹³Ḷampanganmubí in uḷag bo singa, moritak kon singa batánea bo uḷag mobisa.

¹⁴Guman i TUHAN, “Intau inta moibog kon i-Nakó in posaḷamaton-Kubí, inta mopirisaya kon i-Nakó in ḷukadan-Kubí.

¹⁵Aka sia bo mokuani kon i-Nakó, Tubagan-Kubí. Kon tungkuḷ in koantugan in susa, tuḷungan-Kubí in sia; sia in popaḷuputon-Kubí bo ogoian-Ku in kahoromatan.

¹⁶Sia in pooropon-Kubí in umur moḷanggó, bo posaḷamaton-Ku.”