Read Mongondow MAZMUR 92 Bible Online

MAZMUR 92 - Mongondow bible

MAZMUR 92

¹Dondong kon singgai in Sabat.

²Totuubí kon mopia in mopoyaput in sukur kon ini-Mu, o TUHAN, bo modayow kon ini-Mu, Allah Inta Totok in moḷantud;

³Mopotaa-taau mako in tabi-Mu kon dodai in doḷo-doḷom, bo kososatia-Mu kon dodai in doḷom,

⁴sindaḷan mokuti kon gitar mopuḷú in tali, takinan in gambus bo kecapi.

⁵Sin aid-Mu in mokoḷunganga totok kon ginaku, akuoi i modondong takin pia in gina popisí in inta pinomia-Mu.

⁶Totuu moḷoben in bayongan inta inaidan-Mu, o TUHAN, totuu moako in raian-Mu mita!

⁷Intau bodok in diábí mokodoḷop, intau dondunguḷ in diábí mokotaau kon tua.

⁸Aka intau diá mopirisaya mobiag moḷumbá naonda bo bonok, bo intau moraat modugang mooyúon bo mobiag moromon; táe mosia in yopúonbí komintan,

⁹sin Iko, TUHAN, in mongawasa modapot in mononoi.

¹⁰Kinotaauan nami in musung-Mu in yompatonbí, o TUHAN, bayongan in intau moraat in poraritonbí.

¹¹Binaḻí-Mu in akuoi noropot naonda bo bantong ḻindong, bo nomarakat kon inakó in kobiagan motompia.

¹²Akuoi in nokoontong kon kinotaḷowan in musung mita, intau mita inta ain sinimindog nonayow kon inakó, tomayá mita monia inta moraat in dinongogkudon.

¹³Intau motuḻid in monubu naonda bo pangkoi in kurma, bo mobiag moḷumbá naonda bo pangkoi in ḷokuyú in Libanon.

¹⁴Mosia in naonda bo pangkoi in kayu inta pinomuḷa kon Baḷoi TUHAN, bo mobui kon Baḷoi Allah naton,

¹⁵pangkoi in kayu inta tantúpa nomungai umpaka nogurangdon, umuran noḷunow bo notompia.

¹⁶Tuata in noponiata kon ki TUHAN in moadil; Sia in mododuḷuku, diábí in tombogá kon i-Nia.