Read Mongondow MAZMUR 94 Bible Online

MAZMUR 94 - Mongondow bible

MAZMUR 94

¹O Allah, Ikobí in ki Allah inta motuḻí, poontongdon in tontuḻí-Mu, o TUHAN.

²Sindogdon, o Hakim in sinangkub in dunia, hukumdon in intau mododia podudui in aid monia.

³O TUHAN, dapotpa in toonu in intau moraat moḷunganga in gina? Modapot in toonu kaasí o TUHAN?

⁴Mosia in mopoyaput in tosingogon mita inta diá mopia, bo mopoḷoḷatú in aid monia moraat.

⁵Mosia in mondorot kon umat-Mu, o TUHAN, bo nomutuk kon intau mita inta piniḻí-Mu.

⁶Mosia in noḻimod kon boba-bobay bo uno-unon bo intau ango-angoi inta nogutun kon butá tanaa.

⁷Guman monia, “Ki TUHAN in diábí nokoontong kon tua, ki Allah i Yakub in diábí nonaridimai kon tua.”

⁸Ei bangusaku, dikabí námai tua in kobobodok, balajar paké in akaḷmu!

⁹Ki Allah in nomia kon bongoḷan, umpaka yo diá in Sia mokodongog? Sia in nomia kon mata, yo umpaka diá in Sia mokoontong?

¹⁰Sia in notundú kon bangusa mita, yo umpaka yo diá in Sia mohukum? Sia in nobaḻí guru kon bayongan in intau, yo umpaka yo diá in Sia kototaau?

¹¹Ki TUHAN in mokodoḷopbí kon raian in intau, Kinotaauan-Nea kon bayongan intua diábí in mangaḻenea.

¹²Pia in kamang in intau inta sinundú-Mu, o TUHAN, intau inta sinundúan-Mu in hukum-Mu mita.

¹³Pinoodom-Mu in sia kon singgai mita in bodito, nodapot in kinaḻi in bubú sin podomokan kon intau moraat.

¹⁴Sin ki TUHAN in diábí monaḷámai kon umat-Nea; Sia in diábí moḻiong kon kapunyaan-Nea.

¹⁵Dá hukum in posindogonbí bui kon ponisigan, bayongan in intau motuḻid in moibogbí in natua.

¹⁶Ki ine in moduḷu kon inakó nongkon intau inta diá mopirisaya? Ki ine in dumotá kon inakó monayow kon intau inta nogaid kon inta moraat?

¹⁷Aka kuma bo ki TUHAN in diá motuḷung kon inakó, yo gogióbí moibonu in akuoi kon dunia in intau minatoi.

¹⁸Kon tungkuḷ in akuoi norai kon moḷabú in akuoi, tabi-Mu, TUHAN, nokoporoton kon tosindogku.

¹⁹Aka ginaku moondok bo moyayow, Iko in moḻipoi bo moposanang in ginaku.

²⁰Iko in diábí noyopopog in hakim mita inta moraat, inta nonombaḷoi kon inta moraat podudui in hukum.

²¹Mosia in noyopopog monayow kon intau motuḻid, bo mopoḷabú in hukuman matoi kon intau inta diá kotaḷá.

²²Táe ki TUHAN in mododuḷuku. Ki Allahku in nobaḻí mogogoḻingoiku.

²³Sia in mohukum kon intau moraat podudui in aidnea inta moraat, bo nomompon kon bibig monia popisí in dosanea. Ki TUHAN Allah naton in momomponbí kon i monia.