Read Mongondow MAZMUR 95 Bible Online

MAZMUR 95 - Mongondow bible

MAZMUR 95

¹Koḻigai in kita modondong kon i TUHAN, moronggiow kon i Mopoposaḷamat naton!

²Koḻigai in kita mayá in tayowon-Nea takin dondong sukur, moronggiow kon i-Nia takin dondong dodayow.

³Sin ki TUHAN in ki Allah inta moḷantud, Datu inta motorindog inta nonigad kon bayongan in dewa.

⁴Sia in nongawasa nodapot kon bayongan in inta moonag kon butá, nodapot in tudu mita in buḷud Siabí in kitogi.

⁵Sia in nongawasa kon dagat, sin Sia in nomia kon tua, toba doman Siabí in kitogi mia.

⁶Koḻigai in kita dumokó mosumba kon i-Nia, tumungkud kon tayowon i TUHAN, inta nomaḻí kon inaton.

⁷Sin Siabí in ki Allah naton, kita naa in umat inta biniag-Nea, naonda bo domba gombalaan-Nea. Singgai in naa indongogaidon in singog-Nea:

⁸“Dika tumontogat naonda bo mogoguyangmu kon Meriba, naonda kon tungkuḷ in mosia kon Masa, kon padang gurun.

⁹Kon tua mosia in nonungkuḷ kon i-Nakó, umpaka ain nokoontong kon onu in inaidan-Ku.

¹⁰Opat nopuḷú notaong in koonggotnea mobú in Akuoi kon i monia; guman-Ku: Totuu, bangusa tatua in diá motoḷutui! Mosia in diá nopandungmai kon parenta-Ku mita.

¹¹Dá Akuoi in nongibot kon bonu in torú-Ku, mosia in diábí tumuot kon butá tatua bo mokouḻí kon pogogaian takin-Ku.”