Read Mongondow MAZMUR 97 Bible Online

MAZMUR 97 - Mongondow bible

MAZMUR 97

¹Ki TUHAN in Datu! Biódon mako in butá mokoposanang, bo ḻibuton mita in moḷunganga.

²Sia in iḻipung in goḷom bo sindip; kooadil bo hukum in nobaḻí dodoyonan in pomarentaan-Nea.

³Tuḷú in iḷumekep kon tayowon-Nea, nomokak kon musung kon ḻibu-Neamai.

⁴Kilat-Nea in nonimbayag kon dunia, butá nogugur in nokoontong kon i-Nia.

⁵Buḷud mita in iḷumoḷayat naonda bo lilin kon tayowon i TUHAN, kon tayowon i TUHAN, mongongawasa in sinangkub in butá.

⁶Ḷangit in mopotaau in kooadil-Nea, bo bayongan in bangusa nokoontong kon kamuliaan-Nea.

⁷Bayongan in intau inta mosumba kon berhala in pokopooyáanbímai, inta nopoyunggaga kon pakakat mita inta diá in mangaḻenea; bayongan in dewa in dumokóbí [50] kon tayowon i TUHAN.

⁸Intau mita inta nogutun kon Sion bo kon kotá mita in Yohuda in nosanang naonda in nokodongog kon onu inta sinantú i TUHAN.

⁹Sin Iko, o TUHAN, mongongawasa in sinangkub in butá; Iko in moḷantud noiḻiu kon bayongan in dewa.

¹⁰Ei moiko inta moibog kon i TUHAN, kodoídon in inta moraat! Sin ki TUHAN in noḷukad kon kobiagan in umat-Nea, Sia in nopoḷuat kon i monia nongkon kawasa in intau inta diá mopirisaya.

¹¹Bayag ain nomuká kon intau inta motuḻid in gina, bo ḷunganga in gina kon intau inta mojujur.

¹²Pokosanangdon, ei intau mita inta motuḻid in gina popisí in onu inta ain inaidan i TUHAN, bo posukurdon kon i Allah inta motusi.