Read Mongondow AMSAL 1 Bible Online

AMSAL 1 - Mongondow bible

AMSAL 1

¹Naa in tonggina mita i Salomo ki adí ḷoḷaki i Daud, datu in Israel.

²Makusudnea in motuḷungbí kon intau sinbá monotaau kon naonda in mobaḻí mobijaksana, bo monotaau in atorang kon naonda in kobobiag bo monotaau kon tosingogon mita inta modaḷom in mangaḻenea.

³Tonggina mita tanaa in motundú kon naonda sinbá intau mobiag mobijaksana, mojujur, moadil bo mobanar.

⁴Intau inta diá kopongalaman in tundúonnea dá mopandoidon morai, bo intau inta moguodpa in mobaḻídon intau mopandoi bo pororainea in nádon onda bo intau inta ain nogurang.

⁵Pongin tonggina mita tanaa intau mobijaksana in modugang doman in totaaunea, bo intau inta ain notaau in kapiton doman.

⁶Pongin natua dá mosia in monotaaudon kon onu inta noibunipa kon bonu in tonggina bo monotaaudon kon tosingogon mita in intau mobijaksana bo onu mita inta pinoyaput monia.

⁷Sinbá mokouḻí kon pongotahuan inta mopia, yo muna-munamai intau in musti mohoromat bo motoguondok kon i TUHAN. Intau bodok in diábí mohoromat kon hikmat bo doí tundúon.

⁸Tondudutka in onu inta pinoguman i amá bo i inámu kon inimu, adíku,

⁹sin totundú mita monia in mokodugang kon kopopia in dodiamu naonda bo ḷambá in uḷu bo boboḷ inta mokodugang kon koḷoḷunatmu.

¹⁰Aka intau binaradosa monongganut kon inimu, adíku, dikabí duduianmu in tongganut monia.

¹¹Aka mosia in moguman, “Koḻigai, kita motayak kon intau bo ḻibutan naton bongkugon. Tongábí yambá, dá koḻigai in kita momongkug kon intau inta diá kotaḷá.

¹²Tanaa in mosia mobiag mosanang bo mosehat, táe kon singgai moiduduimai mosia in mobaḻíbí naonda bo intau inta mororiga totok.

¹³Gamáan naton in pakakat mita monia inta koboḻi, sinbá baḷoi naton mopuḻing in pakakat mita inagow.

¹⁴Igai tumakin! Bain silaion naton kotongkaion onu inta sinakow!”

¹⁵Dikabí dumudui kon intau mita natua, adíku! Pokoyayúdon kon i monia.

¹⁶Diábí mosanang in gina monia, aka diápa mogaid kon inta moraat. Ibogon monia in ḷagibí moḻimod.

¹⁷Sin umpakabí ḷagapan yo doíbí in dumangat kon bonu in pukot inta ain sinongká kon tayowonnea,

¹⁸táe intau mita inta moraat tatua in motaan kon potait kon i monia tontaní — potait inta mokobodito kon i monia.

¹⁹Totuu, intau inta motayak kon pakéon pongin aid inta moraat, yo nyawaneabí tontaní in toḻiunea.

²⁰Indongogaidon! Hikmat in mogoiní kon daḷan-daḷannea bo momaḷú kon rawang mita!

²¹Sia in momaḷú kon bonawang mita bo kon tampat mita inta morame:

²²“Ei intau dondunguḷ! Modapot in toonu in moiko umuran natua? Toonu in mogogai in moiko in mopoompámai kon pongotahuan bo doí motarima kon topotundú?

²³Indongogai in akuoi aka monoboḷow kon inimu, sinbá poniataku kon inimu onu inta kon bonu in ginaku bo tundúonku onu inta sinotaauku.

²⁴Moiko in inoiníkudon, táe doí mokidongog in moiko bo diá mopandungmai.

²⁵Bayongan in tongginaku in diábí inindongogan monimu bo toboḷowku in diábí inabatan monimu.

²⁶Tuamai, aka moiko mobodito, yo kosingankubí. Aka moiko moondok, yo singkuḻeonkubí.

²⁷Singkuḻeonku in moiko aka moḻia-ḻiaw in gina monimu bo mororiga popisí in kinoantugan in bodito inta namangoi naonda bo deḷang.

²⁸Kon dodai intua moiko in mokuani kon inakó, táe doí in akuoi tumubag. Tayakon magí-mako monimu in akuoi táe diábí mouḻí monimu.

²⁹Moiko in naonda bo intau inta diápa nokoimontanmai in moibog motayak kon sinotaau, bo doí dumudui kon i TUHAN.

³⁰Moiko in diábí kon dodai in onda in moibog motarima kon tongginaku mita andeka moindoimai kon toboḷowku mita.

³¹Tuamai, korasaanbí monimu in bungai in aidmu mita bo tomayámu mita inta moraat.

³²Intau inta diá kopongalaman in matoibí popisí in doí motarima kon inakó, bo intau inta bodok in morimumudbí popisí in doí mopandungmai kon inakó.

³³Táe intau inta mokidongog kon inakó in koḷukadanbí. Sia in mobiagbí moaman bo diá bidon moondok.”