Read Mongondow AMSAL 11 Bible Online

AMSAL 11 - Mongondow bible

AMSAL 11

¹Ki TUHAN in doíbí kon intau inta mopomaké in simbangan inta motombogá táe mopia in gina-Nea kon intau inta mopomaké in pononimbangan inta moitutui.

²Intau inta moḷoḷatú in singkuḻeonbí; intau inta moompá in dodia in mobijaksana.

³Intau mopia in kapiton in aidnea tontaní inta motuḻid; intau inta moibog monguboḷ in rimumudon in uboḷnea tontaní.

⁴Aka tumayowdon kon popatoi, yo kapunyaan in diá bidon in mangaḻenea; mosaḷamatbí in iko aka motuḻid in ginamu.

⁵Daḷan kobiagan in intau mopia in tondodaionbí in ginanea inta motuḻid, táe intau moraat in modiabí kon awaknea mayá in korimumudan.

⁶Intau mojujur in mosaḷamat popisí in kototuḻid in ginanea; intau inta diá motaau pirisayaan, in moiḷosok kon kototuránea.

⁷Aka intau moraat matoi, kamangnea in matoibí domandon; mopongata in ropot tontaní in diá in mangaḻenea.

⁸Intau mobanar in moisimparutbí kon roriga; intau moraat in moyodungkuḷbí in tongkuḷabot.

⁹Pongongumanan in intau moraat in mokoyopú; hikmat in intau mopia in mokosaḷamat.

¹⁰Morame in kotá aka intau mobanar in mokouḻí kon rijiki; intau mita in monggoḷokapbí aka intau moraat in matoi.

¹¹Barakat in intau motuḻid in gina mokogaga kon kotá; tosingogon in intau moraat mokogoguyaat kon inia.

¹²Moningkuḻe kon intau ibanea in oaidbí inta dondunguḷ; intau inta mopandoi, diábí mosingog kon onuka.

¹³Intau inta moibo-ibog mopotaau in habar diá totuu diábí mokotagú kon rahasia, táe intau inta motaau pirisayaan motaaubí mobuni kon pelekara.

¹⁴Bangusa in morimumudbí aka diá in duduianmai; aka mobarong in monononggina, dá modugangdon koḷukadan in kasaḷamatan.

¹⁵Modandi moguboḻi kon boḻi in intau ibanea mangaḻenea mopoangoi in bodito; mopia-piabí kon diá moitakin kon natua mita sinbá moaman.

¹⁶Bobay inta mopia in gina mokouḻíbí kon kahoromatan, intau moromú in mosipun kon kaoyúonan.

¹⁷Intau inta mopia in gina in modiabí kon kauntungan kon inia tontaní; intau inta moromú in mokoporugimaibí kon inia tontaní.

¹⁸Kauntungan in intau moraat in kauntunganbí inta diá in mangaḻenea, kauntungan in intau inta nogaid kon inta mopia in kauntungan inta moḷoben in mangaḻenea.

¹⁹Ki ine in umuran mosatia mogaid kon inta mopia, in mokouḻíbí kon kobiagan mosanang; ki ine in diá umukat kon aid moraat yo mopobayá in popatoi.

²⁰Ki TUHAN in doíbí kon intau inta gina moraat, táe Sia in motabibí kon intau inta nobiag diá in bogit.

²¹Intau moraat in notantú bidon kon hukumon; intau mopia in mosaḷamatbí.

²²Koḷunat in bobay inta diá mopia notongkai in sising buḷawan kon tunggi in boké.

²³Onu in koibog in intau mopia umuranbí mokopoangoi kon inta mopia, táe inta motaau harapon mako in intau moraat in tongábí tumorú.

²⁴Oyúon in intau moibog mobogoi, táe modugangbí mooyúon, oyúon in morinut, táe modugang mobiag mobogá.

²⁵Intau inta mokakit mobogoi in umuranbí mobarong in kaoyúonannea, intau inta moibog motuḷung in tuḷunganbí doman.

²⁶Ki ine in momontuyung in odi-odianmai in intau, táe intau inta mopotaḷui intua yo sia tua in dayowonbí.

²⁷Ki ine in morajing mogaid kon inta mopia kinosanang in intau; ki ine in motayak kon inta moraat, in koantuganbí in roriga.

²⁸Ki ine in mopongata in kaoyúonan in mototakbí naonda bo dáun noingkag; intau inta mobanar in modugangbí mobayong naonda bo tokat moguod

²⁹Intau inta moposusamai in tonibuḷoinea, in kobuḻianbí in bayongan yagi-yagi. Intau bodok in mobantungbí kon intau inta mobijaksana.

³⁰Intau inta mobiag motoindudui in kinoḷukadan bidon in kobiagannea; intau inta mobijaksana modugang in dumoduduinea.

³¹Aka kon dunia naa bo intau mopia in mokouḻí kon tontuḻínea, yo notantú bidon kon intau moraat bo binaradosa in mokouḻíbí kon hukuman.