Read Mongondow AMSAL 13 Bible Online

AMSAL 13 - Mongondow bible

AMSAL 13

¹Adí moarip in mokidongogbí in aka tongginaan i amánea; intau moḷoḷatú in doíbí toboḷowon.

²Tosingogon in intau mopia mokopoangoi kon kauntungan; intau inta diá motuḻid in gina moibog kon aid moromú.

³Intau inta muna morai bo mosingog moaman in kobiagannea; intau inta tongá kino singo-singognea koantugan in roriga.

⁴Intau maḷat mobayong in koibognea táe diábí tobatúmai in kodapotannea; intau inta totok in moḷongasi in mogaid mouḻínea in bayongan inta kinoibognea.

⁵Intau motuḻid in gina in doíbí kon inta uboḷ, dodia in intau moraat mokooyá bo kinodoí.

⁶Aid mojujur moḷukad kon intau inta mobiag motuḻid; aid moraat mokorimumud kon intau inta binaradosa.

⁷Oyúon in tumangoi nooyúon, bokaka diá koonu bo onu; oyúon in ḷumabit nobiag bogá, bokaka nooyúon totok.

⁸Intau nooyúon musti mopoḷuai in doitnea sinbá moaman in kobiagannea; intau bogá noiḷuat nongkon gogondok.

⁹Intau mobanar naonda bo sindar inta motarang; intau moraat naonda bo togá nopiong.

¹⁰Ḷoḷatú tongábí mokopopisí kon porogenggengan; intau inta mobijaksana moibog motarima kon totundú.

¹¹Kaoyúonan inta nouḻí diá irorigaan in motoyongbí doman mogaat; táe kapunyaan inta piniḻim-piḻikmai sinipun in kodugang-kodugangbí.

¹²Aka kamang diá intompodan, mororiga in gina; aka ibog kinodapotan, mosanang in gina.

¹³Intau inta diá mopandung kon totundú i TUHAN, mopobodito kon awaknea tontaní; intau inta motoindudui kon hukum i Allah in motarimabí kon tontuḻínea.

¹⁴Totundú in intau mobijaksana in naonda bo pangkoi in kopiaan; aka oyúon in mokoondok, totundú tatua in moposaḷamat.

¹⁵Intau inta mopia in aid in horomatonbí; intau inta diá motaau pirisayaan mobiagbí mororiga.

¹⁶Intau mobijaksana in munapabí morai bo dongka mogaid; intau bodok mongonguman kon kobobodoknea.

¹⁷Totabá inta diá mobanar mokopoangoi kon bodito; totabá inta motaau pirisayaan in modia kon inta mopia.

¹⁸Intau inta doí tundúon in mobaḻí mobogá bo tososingkuḻe; intau inta moibog mokidongog kon tonggina in horomatonbí.

¹⁹Totuubí mopia aka mokouḻí kon onu inta kinoibog! Intau bodok doíbí monaḷámai kon inta moraat.

²⁰Intau inta moyobayat takin in intau mobijaksana, in mobaḻíbí mobijaksana; intau inta moyobayat in intau bodok, in moboditobí.

²¹Intau binaradosa umuranbí batu-batukon mako in roriga intau mopia umuranbí motarima kon inta mokosanang.

²²Intau mopia in mopoabatbí in kaoyúonannea kon i adí bo ompunea; kaoyúonan in intau binaradosa in sinagú kon intau inta motuḻid in kobiagannea.

²³Butá inta diá in pinomuḷa mobogoibí in kaanon moantó kon intau bogá; táe aid diá moadil mokopopisí kon butá tatua diá tonggobaan.

²⁴Diá moḷubag kon adí, yo mangaḻenea kon tua in diábí motabi kon inia; aka motabi, yo mustibí mokobaḻí in moḷubag kon inia.

²⁵Intau inta mopia tantúbí oyúon in pakéonnea, táe intau moraat umuran kodaitan.