Read Mongondow AMSAL 14 Bible Online

AMSAL 14 - Mongondow bible

AMSAL 14

¹Tonibuḷoi in pinosindog dinoyon kon kobobijaksana in bobay, táe irumbun in kobobodoknea.

²Intau inta mojujur in moondok bo mohoromat kon i TUHAN Allah; intau inta kobiagannea diá motuḻid in gina moningkuḻe kon i-Nia.

³Popisí in ḷoḷatúnea, dá intau bodok dumuí tontaní; intau mobijaksana in ḷukadanbí in tosingogonnea tontaní.

⁴Aka diá in sapi, dá diábí doman in bungai in boyó; pinongin ropot in sapi, dá mobarongdon totok in bungai in boyó.

⁵Sakusi inta mojujur tantúbí moguman kon onu inta totuu, sakusi inta diá motaau pirisayaan tantúbí monguboḷ.

⁶Intau moḷoḷatú in diábí mobaḻí mobijaksana, táe intau mopandoi motoyongbí in pobalajarannea.

⁷Dika moyobayat in intau dondunguḷ; sin diábí in motaaunea tundúon kon inimu.

⁸Intau mobijaksana in kotaauanneabí onu in aidannea, intau bodok koakaḷan in kobobodoknea.

⁹Intau bodok in diábí mopandungmai mongo dosanea ampungan andeka diá; intau mopia in moibogbí ampungan in dosanea.

¹⁰Ḷunganga andeka robonoḷ in gina in noinonombí kon bonu in dodob; intau ibanea in diábí moitakin mokorasa kon tua.

¹¹Baḷoi in intau mopia umuranbí moroton; baḷoi in intau moraat in moumpagbí.

¹²Oyúon in daḷan inta koontongan in motuḻid, táe imbuitnea daḷan tatua in modiabí kon popatoi.

¹³Kon ḻikud in kosing degá oyúonbí in ombaḷ; ḷunganga in gina oyúonbí doman in imbuitan in robonoḷ in gina.

¹⁴Intau moraat in motarimabí doman kon bungai in aidnea moraat, intau mopia in motarimabí doman kon bungai in aidnea mopia.

¹⁵Intau bodok in mopirisayabí kon bayongan in tosingogon, intau mobijaksana in umuranbí mokopoingat.

¹⁶Intau mopia in umuranbí mokopoingat bo yumayú kon inta moraat, intau bodok in tumorú totok, bo mokorasa kon moaman.

¹⁷Intau tumorú in mogaid kon inta mobodok; intau mobijaksana in mosabar.

¹⁸Intau inta diá kopongalaman in motombodok; intau mobijaksana modugang in pandoinea.

¹⁹Intau moraat in tumungkudbí kon intau inta motuḻid in gina, sin mopoigum sinbá totabionpa.

²⁰Intau bogá in kodoíbí umpaka yobayatnea mita; táe intau nooyúon nobayong in yobayatnea.

²¹Ki ine in mopoompámai kon intau ibanea, mogaid kon dosa; ki ine in mopia in gina kon intau bogá yo mosanang in ginanea.

²²Ki ine in momatuk kon inta mopia, yo pirisayaanbí bo horomaton; ki ine in monomayá kon inta moraat sia in moiḷaḻebí.

²³Kon bayongan in totayak oyúonbí in kauntungan; ouman inta diá totuu mokopopisí kon mobiag mobogá.

²⁴Intau mobijaksana dinayow popisí in kabijaksanaannea, intau bodok ponango-nangoian popisí in kobobodoknea.

²⁵Aka sakusi tobatú mosingog kon totuu, yo sia in moposaḷamat kon kobiagannea; aka monguboḷ in sia; yo sia in momaḻidawan kon tumpaḷa intau.

²⁶Intau inta motoguondok kon i TUHAN in mobiag mosanang, bo motoḷuadínea in ḷukadan.

²⁷Motoguondok kon i TUHAN in mobaḻí pangkoi in kobiagan mopia; bo daḷan simimparut kon popatoi.

²⁸Kokokawasa in datu noidoyon kon kobayong in rayatnea; aka diá in rayat diábí in sia motaau mongawasa.

²⁹Intau mobijaksana diábí in sia bayá-bayá tumorú; intau bodok diá mokoigon kon ginanea.

³⁰Gina moonow mokosehat kon awak; intoi naonda bo takit inta mokopatoi.

³¹Ki ine in mopoaid in mopia kon intau bogá, mohoromat kon i Allahnea; ki ine in mopororiga kon intau moyangkó, mopoompámai kon i Inta nomaḻí kon inia.

³²Intau moraat moyopú popisí in aidnea moraat, intau mopia ḷukadan in aidnea inta motuḻid.

³³Hikmat in tantúbí oyúon kon bonu in raian in intau mopia; táe diábí in sia kon gina in intau bodok.

³⁴Aid moadil bo aid mopia mopoḻintakbí kon tangoi in bangusa, táe dosa in mokopopisí kon bangusa poompáanmai.

³⁵Mopiabí in gina i datu kon pogawai inta mopandoi; táe torúanneabí in pogawai inta diá motaau mogaid kon oaidannea.