Read Mongondow AMSAL 15 Bible Online

AMSAL 15 - Mongondow bible

AMSAL 15

¹Singog inta moḷukó, mokopiong kon torú; tubag inta mopatú mokotagab kon torú.

²Tosingogon in intau mobijak mokopomia kon gina moangá kon sinotaau; tosingogon in intau bodok tongábí moguman kon kobobodok.

³Ki TUHAN in nokoontongbí kon bayongan inta nobaḻí kon bayongan in tampat; Sia in noindoibí kon bayongan inta mopia bo inta moraat.

⁴Tosingogon mita inta mopia mokoroton kon gina, tosingogon mita inta moraat mokoinggamá kon ibog.

⁵Intau bodok diá mopandung kon tonggina i amánea, intau mobijak mokidongog kon toboḷow.

⁶Kon baḷoi in intau mopia mobarong in kaoyúonan; kaoyúonan in intau moraat iyompat in bodito.

⁷Tosingogon mita in intau mobijaksana nopuḻing in sinotaau, táe raian in intau bodok in diábí natua.

⁸Ki TUHAN in motarima kon sambayang in intau mopia, táe doíbí in Sia kon sosumba in intau moraat.

⁹Ki TUHAN in doíbí kon kobobiag in intau moraat, táe Sia in motabibí kon intau inta moḷongasi mogaid kon onu inta kinoibog-Nea.

¹⁰Intau inta mogaid kon inta moraat in rorigaanbí; intau inta doí toboḷowon in matoi.

¹¹Ki TUHAN in nonotaaubí kon dunia in intau minatoi bo bayongan in yagi-yaginea; yo umpaka dá raian in intau bunion kon i-Nia?

¹²Intau inta moibog mopoompámai kon intau ibanea in doíbí toboḷowon; doíbí in sia mopoigum in tonggina kon intau mobijaksana.

¹³Gina mosanang mokotarimbuka kon pogot; gina inta morobonoḷ in mokoḷungkoyó.

¹⁴Intau mobijaksana motayak kon sinotaau; intau bodok tongá mosibuk in kobobodoknea.

¹⁵Intau inta molamurú mako musti tantú rumopot kon bonu in kobiagannea, táe inta mokosing mako umuranbí mosanang.

¹⁶Maníka bo moyakag in kapunyaan táe takin motoguondok kon i TUHAN, dika in mobayong in kapunyaan táe umuran moondok mako.

¹⁷Mopia-piabí kon mokaan kon kuyat táe takin totabian, dika in mokaan kon ponoyá inta mopira táe takin yoyaatan.

¹⁸Intau inta motoyong tumorú mokopomuká kon bobayowan, intau inta mosabar modia kon dodamean.

¹⁹Intau maḷat umuranbí koantugan in roriga; intau motuḻid in gina diábí moyodungkuḷ in roriga.

²⁰Adí inta mobijaksana, mokosanang kon gina i amánea; adí inta mobodok diábí mohoromat kon i inánea.

²¹Kobobodok in kasananganbí in intau dondunguḷ, intau mobijaksana in mobiagbí motuḻid.

²²Tomayá diábí motudun, aka diá muna raion kopiaan; tomayá in kodapotan, aka umuran mononggina.

²³Tosingogon mita inta siningog inta noitaná kon wakutunea, mokopoangoi kon sanang in gina.

²⁴Intau mobijaksana dumudui kon daḷan monakod inta mopobayá in kobiagan; deemanbí daḷan mosiḻig inta mopobayá in popatoi.

²⁵Ki TUHAN in mogumpagbí kon baḷoi in intau inta motosiḷantud, táe butá in intau boba-bobay ḷukadan-Nea.

²⁶Ki TUHAN in doíbí kon tomayá inta moraat; táe tosingogon mita inta mopia mokosanang kon gina-Nea.

²⁷Ki ine in motayak kon kauntungan pongin mosindip, in morimumudbí kon motoḷuadínea tontaní. Ki ine in doí motarima kon doit pinosogó, mobiag mosanang.

²⁸Intau mopia morai muna bo mosingog; intau moraat mosingog kon inta moraat.

²⁹Ki TUHAN in mokidongogbí aka intau mopia mosambayang, táe Sia in doíbí mopandungmai kon intau moromú.

³⁰Pogot mosanang mokoḷunganga kon gina, habar inta mopia mokoundam kon gina.

³¹Intau inta mokidongog kon toboḷow in moyotakinbí in intau mobijaksana.

³²Intau inta doí tongginaan, diábí mohoromat kon awaknea tontaní; intau inta moibog toboḷowon, mobaḻí mopia.

³³Motoguondok kon TUHAN in nobaḻí dodoyonan in topotundú inta mopia; kahoromatan inunaan in ompá in dodia.