Read Mongondow AMSAL 16 Bible Online

AMSAL 16 - Mongondow bible

AMSAL 16

¹Intau in motaaubí in momia kon tomayá, táe ki Allahbí in monantú.

²Bayongan aid in intau degá mopiabí in ontongonnea tontaní, táe ki TUHANbí in noindoimai kon bonu in ginanea.

³Poandoḷdon kon i TUHAN in bayongan tomayámu, dá kodapotanmubí intua.

⁴Bayongan yagi-yagi inta inaidan i TUHAN oyúonbí in makusudnea; bo makusud in intau moraat tuata in bodito.

⁵Bayongan in intau moḷoḷatú kinodoí i TUHAN; Diábí pomayá-Nea mako in mosia kotaḻiban in hukuman.

⁶Intau inta tumoḷutui kon i Allah in ampunganbí; intau inta mopirisaya in moisimparutbí kon bayongan inta moraat.

⁷Aka iko mokosanang kon gina i TUHAN, musungmu mita in baḻíon-Neabí yobayat.

⁸Maníka moyakag in mouḻí táe noidoyon kon gina motuḻid, dika in mobayong in mouḻí táe pinongin aid motombogá.

⁹Intau in motaaubí momia kon tomayá, táe ki Allahbí in monantú kon daḷan kobiagannea.

¹⁰Datu in motarima kon kawasa nongkon i Allah, dá, diábí in sia kotaḷá in monantú kon ibognea.

¹¹Ibogon i TUHAN intau mokopotuḻid kon gina aka modagang, ná doman tua in mopomaké in ukuran bo simbangan.

¹²Kon mongongawasa, mogaid kon inta moraat in mokooyábí, sin pomarentaannea in moroton popisí in moadil.

¹³Tosingogon totuu in mokosanang kon mongongawasa, sia in motabibí kon intau inta mosingog mobanar.

¹⁴Torú in datu in naonda bo habar hukuman matoi; intau inta mobijaksana moḷongasi mopoonow kon inia!

¹⁵Kopopia in gina i datu mokopoangoi kon kobiagan motompia, naonda bo goḷom mopoḷabú in uyan kon tungkuḷ in pononinggai.

¹⁶Mokouḻíbí kon hikmat in mopia-pia kon mokouḻí kon buḷawan; mokouḻí kon sinotaau in mobara-baraguna in mokouḻí kon saḷaka.

¹⁷Intau mopia yumayúbí kon inta moraat; intau inta monaridi kon kobobiagnea, moḷukad kon awaknea.

¹⁸Aid moḷoḷatú mokopopisí kon korimumudan; mododia mokopopisí kon korumbunan.

¹⁹Maníka bo moompá in dodia bo diá kokaoyunan, bo dika in dumudui kon intau moḷoḷatú bo mokaan kon kaoyúonan inta inagow monia.

²⁰Taridi in onu inta ain sinundú kon inimu, dá iko in mokouḻíbí kon onu inta mopia. Popirisaya kon i TUHAN, dá mosanangbí in iko.

²¹Intau mobijaksana in kotaauanbí kon pororainea inta mopandoi; potosingognea inta mokosanang, mokorigon kon onu in siningognea.

²²Kobobijaksana in nobaḻí pangkoi in kopiaan kobiagan in intau mopia; intau bodok in rorigaan in bodoknea tontaní

²³Raian in intau mopia in mokopomuká kon tosingogonnea mita mobijaksana, bo totundúnea mokoyakindon totok.

²⁴Tosingogon moḷukó notongkai in biluk; moromimit in korasaan bo mokosehat kon awak.

²⁵Oyúon in daḷan koontongan in motuḻid, táe imbuitnea daḷan tatua modia mayá in popatoi.

²⁶Ibog mongaan moguman kon intau sinbá mogaid; popisí in siannea, dá pakisadon in sia mogaid.

²⁷Intau moraat moḷongasi mopobodito kon tumpaḷa intau; tosingogonnea mita moraat ná tuḷú mokopokak.

²⁸Intau motombogá mokopomuká kon rogenggeng; intau inta moibog moponapud in uboḷ mokogoguyaat kon yoyobayatan.

²⁹Intau moromú monguboḷ kon yobayatnea mita, bo modia kon i monia sinbá mobodito.

³⁰Mokopoingatdon kon intau inta momomi bo mongiloi, sia in koyogotbí in morai kon inta moraat kon bonu in ginanea.

³¹Intau mojujur in ogoianbí in umur moḷanggó; ubannea in naonda bo mahkota inta mopouḻi-uḻinag.

³²Diá ḷagi tumorú tuabí in mopia-pia in kokawasa; mokoigon kon gina in mopia-pia in mokotaḷow kon kotá.

³³Popisí in monotaau kon ukur, intau mopogonik in undi, táe inta motubag in tongábí ki TUHAN tontaní.