Read Mongondow AMSAL 17 Bible Online

AMSAL 17 - Mongondow bible

AMSAL 17

¹Maníka kaanon topoputok takin popiaan, dika in kaanon mopia inta mobarong takin bobayowan.

²Bobantung inta mopandoi in mongawasabí kon adí inta moḷawang; bo motarimabí kon tonsilai moyotakin i utat mita in adí tatua.

³Buḷawan bo saḷaka in ujionbí kon tuḷú, táe gina in intau in ujionbí i TUHAN.

⁴Intau moraat dumuduibí kon tonggina mita inta moraat, intau mouboḷ moibog mokidongog kon tosingogon mita uboḷ inta ponapud.

⁵Ki ine in moningkuḻe kon intau bogá yo mopoompábímai kon i Allah inta nomaḻí kon inia. Ki ine in mosanang in gina kon koboditoan in intau, yo notantúbí kon mokouḻí kon hukuman.

⁶Inta mokoḷunganga kon intau inta ain nogoguyang in adí bo ompubí; mokoḷunganga kon adí in guyanganeabí.

⁷Intau inta ihoromat in diábí patus mosingog kon uboḷ; intau bodok diábí patus mosingog kon tosingogon mita inta baraguna.

⁸Oyúon in morai kon doit sogó in mokopoangoibí kon inta mokoherang; pongin doit sogó yagi-yagi in koaidanbí.

⁹Aka moibog kosanang in intau, ampungai in taḷá inta inaidan monia. Tantú mongonguman kon taḷá tongábí mokobontow kon yoyobayatan.

¹⁰Toboḷow komintan moiḻiu in mangaḻenea kon intau moibog mokidongog bo mopia-piabí kon ḷubag kogatut kon intau bodok.

¹¹Intau moraat umuranbí mokopomuká kon ropatoi, táe popatoi in mamangoi kon inia nobaḻí totabá inta moromú.

¹²Mopia-piabí kon moyodungkuḷ in ki iná in beruang inta kinobuḻian i adínea, dika in moyodungkuḷ in intau bodok inta kinawasa in kobobodoknea.

¹³Ki ine in mopotuḻí in moraat kon inta mopia, yo aid moraat tatua in diábí doman kopoḷuaian nongkon baḷoinea.

¹⁴Momangkoi kon rogenggeng in naonda bo mobuká kon daḷan in tubig; tuamai in undokdon wakutu in diápa momangkoi in rogenggeng.

¹⁵Ki TUHAN in doíbí kon intau inta mopobanar kon intau moraat, bo inta mopotaḷá kon intau inta diá kotaḷá.

¹⁶Diá baraguna in intau bodok mokopodait kon doit motayak kon hikmat, sin sia in diábí koraian inta mosehat.

¹⁷Yobayat tobatú umuranbí mosatia kon topotakin, táe utat tobatú moitakin mobaba kon roriga.

¹⁸Intau inta modandi moguboḻi kon boḻi in tumpaḷa intau in intaubí inta bodok.

¹⁹Intau inta moibog kon dosa, in moibogbí morogenggeng. Intau inta moambungangaḷ, motayakbí kon korimumudan.

²⁰Intau inta mouboḷ in diábí mosanang, intau inta tongá kinosingo-singognea in mokouḻíbí kon bodito.

²¹Mokouḻí kon adí inta dondunguḷ in notongkaibí in nokouḻí kon robonoḷ in gina; mobaḻí amá in adí inta bodok diábí mobogoi in inta mokosanang kon gina.

²²Gina inta mosanang in mokosehatbí kon awak; gina molamurú mokoinggamá kon ibog.

²³Hakim inta diá moadil, in umuni-uni motarima kon doit posogó bo diábí in sia mopobayá in onu inta moadil.

²⁴Inta batukon in intau mopandoi in tongábí bá mokouḻí kon hikmat, táe inta batukon in intau bodok in diá motantú.

²⁵Adí inta bodok mokosusa kon i amánea, bo mokoajar kon gina i inánea.

²⁶Diábí patus in momaké in denda kon intau inta diá kotaḷá; diábí patus in mondorot kon intau inta mopia in oaid.

²⁷Intau inta mopandoi in raiannea, diábí mobarong in singog. Intau inta mobijaksana, umuranbí moodom.

²⁸Intau inta nobodokabí yo sangkaanbí mopandoi bo mobijaksana aka sia bo tongá kibio-biómai bo diá moposingo-singog.